Obispo, nanawagan sa ilang foreign agencies: Pagkain at kabuhayan ang kailangan
PINUNA ni Borongan Bishop Crispin Varquez ang gawi ng ilang banyagang ahensya na tumutulong sa mga biktima ni "Yolanda" sa Silangang Samar. Inuna umano ng ahensyang ito ang pamamahagi ng contraceptives tulad ng mga condom at pilduras.
Sa halip na birth control, makabubuti pa na bigyan ang mga biktima ng pagkakakitaan at iba pang kailangan upang mabuhay.
Matapos ang anim na buwan mula ng tumama ang trahedya, hirap pa rin sa pagkain ang mga biktima ng bagyo, walang pangmatagalang matitirhan at walang hanapbuhay na kailangan upang makabawi at makaahon sa kahirapan.
Idinagdag ng obispo sa panayam ng Pacific Times, kailangan umanong maging maingat ang pakikipagtalastasan sa mga non-government organizations sapagkat nagagamit nila ang kahirapan ng mga biktima.
Nanawagan ang obispo sa mga pari lalo na nakadistino sa mga malubhang apektado ng bagyo na hilingin sa kanilang mga kababayan na tanggihan ang artificial birth control devices na iniaalok ng ilang mga ahensya na hindi naman niya pinangalanan.
Anang obispo, kailangang turuan ang mga mamamayan na tanggapin ang mga pabahay at pagkakakitaan subalit tanggihan ang pagsusulong ng artificial reproductive devices.
May karapatan ang mga nakaligtas sa bagyo na magkaroon ng maayos na kalusugan at buhay at ang artificial reproductive devices ay peligro sa mga karapatang ito.
Kahit hindi pinangalanan ng obispo ang ahensya, litaw ang United Nations Population Fund sa pamamahagi ng family planning devices sa mga biktima ng bagyo. Ayon sa mga nakasaksi, matapos manalasa ang bagyo, naglunsad ng information campaign hinggil sa birth control services sa Silangang Kabisayaan ang UNFPA.
Naringgan din ang ahensya na nababahala sila sa pagkakaroon ng unwanted pregnancies at pagkalat ng sexually transmitted diseases.
1 2 3 4 5
