Senador Grace Poe: nararapat may hotline ang media sa pulis
ANAK NG NAPISLANG NA MAMAMAHAYAG, HUMARAP SA SENADO. Nagsalita kanina sa pagdinig ng Senate Committee on Public Order ang anak ni Rubie Garcia, (gitna) at nanawagan na lutasin ang pagpaslang sa kanyang ina. Nasa kaliwa si Senador Grace Poe na nagsabing kailangan ng isang inter-agency committee upang masuri at magkaroon ng mas madaling pagsisiyasat sa mga mamamahayag na napapaslang. May 48 ng mamamahayag ang napapaslang sa PIlipinas mula noong 2001 hanggang ngayon. (Senate PRIB/Sen. Grace Poe)
SINABI ni Senador Grace Poe na kailangang magkaroon ng direct line ang mga propesyunal na mamamahayag sa pulisya dahilan sa serye ng mga krimen laban sa mga peryodista at mga brodkaster.
Sa pagdinig na ginawa ng Senate Committee on Public Order and Dangerours Drugs na pinamunuan ng babaeng mambabatas kasama sa Committee on Justice and Human Rights sa ilalim ni Senador Kokko Pimentel, sinabi ni P/Supt. Henry Libay na mula sa 48 insidente ng media killing mula noong 2001, anim pa lamang ang nalulutas na nagwakas sa paghahatol sa mga salarin.
Sa pangyayaring ito, sinabi ni Senador Poe na nararapat magkaroon ng hotline ang mga mamamahayag sa PNP. Nagkataon lamang na may pangyayaring sangkot ang pulisya sa pagpaslang sa mga mamamahayag.
Kailangang pagpulungan ng iba't ibang ahensya ng pamahalaan ang extrajudicial killings at magsumite ng progress report sa komite at magkaroon ng kinatawan ang mga mamamahayag upang magkaroon ng sapat na koordinasyon.
Nakiisa si Senador Poe sa mga mamamahayag sa panawagang lutasin ang pagpaslang kay Robelita "Rubie" Garcia. Nagsalita ang anak ng biktima sa pagdinig kanina.
Idinagdag ni P/Supt. Libay na mula sa 48 insidente ng pagpaslang sa mga mamamahayag, 36 na ang nasa hukuman. May 12 kasong nililitis, anim ang archived, anim ang natapos ng may kaukulang hatol, apat ang napawalang saysay at lima ang na-dismiss.
1 2 3 4
