Karamihan ng mga Filipino sa Libya, nais manatili sa magulong bansa
MAS maraming mga Filipino ang nagnanais manatili sa Libya at patuloy na magtrabaho kahit pa may napipintong mga panganib sa kanila. Ito ang sinabi ni Assistant Secretary Charles Jose na mula sa 13,000 mga Filipino sa magulong bansa, aabot lamang sa higit sa800 katao ang nakauwi sa Pilipinas samantalang may 200 nas Embahada ng Pilipinas sa Tripoli ang naghihintay ng repatriation.
Sa isang mensaheng mula kay Asst. Secretary Charles Jose, karamihan sa mga Filipino sa Libya ay nagnanais manatili sa bansa dahilan sa kanilang mga hanapbuhay. Mas malaki umano ang pagkakataong mabuhay sa Libya na may digmaan sapagkat nangangamba silang walang matatamong hanapbuhay sa Pilipinas kung sakaling umuwi sila.
Hindi na makontrol ng pamahalaan at militar ang sagupaan sa pagitan ng dalawang armadong grupo sa nakalipas na tatlong linggo. Karamihan sa mga bansa sa kanlurang bahagi ng daigdig ang nagpauwi na ng kanilang mga tauhan sa iba't ibang embahada matapos magsagupaan na Tripoli at sa Lungsod ng Benghazi. Nangangamba na sila na mauuwi na sa digmaan ng magkakalahi matapos mapatalsik si Muammar Gaddafi.
Karamihan ng mga Filipino sa Libya ay mga propesyunal sa malalaking kumpanya ng petrolyo, konstruksyon, at mga pagamutan. Ani G. Jose, mas gusto na nilang hawakan ang kanilang mga trabaho kaysa umuwi ng Piipinas kahit pa mayroong deployment ban sa bansa may dalawang buwan na ang nakalilipas.
Ipinaliwanag pa ni Asst. Sec. Jose na noong itaas ang Alert Level sa ikatlong bahagdan, sinabi ng mga manggagawa na tahimik naman at ligtas sila sa Libya. Naniniwala ang mga manggagawa na ligtas sila sa Libya at kung sakaling umuwi ay walang mapapasukang trabaho sa Pilipinas.
May sisenta porsiyento ng mga naglilingkod sa mga pagamutan ay mga Filipino at kung daglian silang aalis, wala nang magpapatakbo ng mga pagamutan.
1 2 3 4 5 6
