Maraming Filipino ang nanganganib magpatiwakal
MGA OBISPO, NABABAHALA SA MGA KABATAANG NAGPAPATIWAKAL. Isang pagpupulong ang pinamunuan nina Bishop Elenito Galido at Leopoldo Jaucian sanhi ng mga balitang maraming mga kabataan ang nagpapatiwakal dahilan sa mga problema sa kanilang pagkatao, pamilya at pressure sa pang-araw-araw na buhay. Naghahanap umano ang mga kabataan ng kahulugan ng buhay. (Melo M. Acuna)
NABABAHALA ang Episcopal Commission on Culture sa pamumuno ni Iligan Bishop Elenito Galido na maraming mga kabataan ang nanganganib magpatiwakal kung hindi madadaluhan ang kanilang pangangailangan. Ito ang dahilan kaya't nagdaos ang kanyang komisyon ng dalawang araw na pagpupulong sa Santuario de San Antonio noong nakalipas na Biyernes at Sabado.
Sa isang panayam, sinabi ni Bishop Galido na ito ang lumalabas na trend sapagkat nagkaroon na naman ng isang tanyag na taong nagpatiwakal sa katauhan ni Robin Williams. Napapanahon ang kanilang pagtitipon sapagkat maraming naririnig na mga balita sa mga parokya at mga paaralan na dumadalas ang pagpapatiwakal.
Inamin ni Bishop Galido na bagama't walang klarong statistics, napapag-usapang personal ang dahilan ng pagpapatiwakal dahilan sa posibleng pressure mula sa pamilya, mga kaibigan at iba pang sektor na nagiging dahilan ng severe depression.
Wala umanong maliwanag na pinagkukunan ng suporta o tulong upang mapigilan ang pagpapatiwakal at isang hakbang ang kanilang ginawa upang mamulat ang lahat sa katotohang nagaganap. Kailangan ng pag-unawa at maibsan ang mga pangyayaring ito.
Sa panig naman ni Bangued Bishop Leopoldo Jaucian, SVD, chairman ng Episcopal Commission on Youth, may mga nagpapatiwakal sa kanilang paghahanap ng kanilang pagkatao, paghahanap ng kahulugan sa buhay at walang mabalingan upang mahingahan ng kanilang dinaranas na kahirapan.
Ani Bishop Jaucian, ang mga kabataan ang nanganganib na magpatiwakal. Mahalaga umano sa Simbahang pakilusin ang mga parokya at mga paaralan upang daluhan ang pangangailangan ng payo ng mga kabataan.
1 2 3 4
