Limang araw na pagpupulong ng mga mamamahayag, sinimulan na
DALAWAMPU'T ISANG MAMAMAHAYAG NG ASIA-PASIPIKO NA SA ADB. Pormal na binati ni VP Bindu Lohani (kaliwa) ng ADB ang mga mamamahayag na dumalo sa limang araw na pagpupulong sa Punong Tanggapan ng ADB sa Mandaluyong City. Tampok sa pagpupulong ang pagdalaw sa Tacloban sa Miyerkoles. Aalamin kung ano ang nagawa upang makabangon ang Tacloban City na hinagupit ng bagyong Yolanda noong isang taon. (ADB Photo)
SINIMULAN kaninang umaga ang limang araw na pagpupulong ng mga mamamahayag na itinataguyod ng Asian Development Bank hinggil sa development reporting.
Sa kanyang pananalita, sinabi ni Bindu N. Lohani, Vice President ng Knowledge Management and Sustainable Development ng ADB, na nakikita na ang lumalawak na ang agwat ng mayayaman sa mahihirap. Kailangang magkaroon ng pagsusuri sa mga palatuntunang ipinatutupad upang mabawasan ang agwat ng mga mamamayan.
Sa pagkakaroon ng kaunlarang natamo sa nakalipas na ilang taon, nagkaroon din ng kaakibat na suliranin sa larangan ng kalikasan. Kailangang magkaroon ng maayos at pinag-isang pagkilos.
Pagsapit ng taong 2050, aabot sa 52% ng pandaigdigang Gross Domestic Product ang magmumula sa Asia. Ngayon ay umaabot pa lamang sa 28% ng GDP ng daigdig ang mula sa rehiyon.
Kailangang magkaroon ng kakayahan ang mga pinuno ng rehiyong gumawa ng mga napapanahon at mahahalagang desisyon upang matugunan ang pangangailangan ng mga mamamayan.
Ang pinakamalaking hamon sa ngayon ay ang pagsugpo sa kahirapan sa pagkakaroon ng inclusive growth na nararapat maging kaaya-aya sa kapaligiran.
Bukod sa mga mamamahayag mula sa Pilipinas, dumadalo rin ang mga media practitioner ng Azerbaijan, Bangladesh, Fiji, People's Republic of China, India, Indonesia, Myanmar, Pakistan, Thailand at Vietnam.
Matatampok sa pagpupulong na ito ang pagdalaw sa Tacloban City sa darating na Miyerkoles at Huwebes upang masaksihan ang mga nagaganap na pagbabago matapos hagupitin ng bagyong "Haiyan" noong ika-walo ng Nobyembre, 2013 na ikinasabi ng higit sa 6,000 katao.
1 2 3 4 5 6
