General Napeñas, pinagsabihang huwag munang mag-ulat

General Purisima, walang papel sa operasyon sa Mamasapano

SENADO, NAGSISIYASAT SA NAGANAP SA MAMASAPANO. Makikita sa larawan sina Senate President Franklin M. Drilon (kaliwa) at Senador Grade Poe na nakikinig sa mga pahayag ng mga nakababatid ng mga pangyayari sa Mamasapano, Maguindanao na ikinasawi ng 44 na tauhan ng Philippine National Police. (SENATE PRIB Photo)

NANINDIGAN si dating PNP chief Director General Alan Purisima na wala siyang papel sa naganap na operasyon. Ito ang kanyang pahayag sa idinaos na pagdinig sa Senado kanina.

Sa pagtatanong ni Senador Teofisto Guingona III sa pagdinig ng Senate Committee on Public Order kasama ang Committees on Peace, Unification and Reconciliation kasama at Finance,tumanggi si Purisima na siya ang nag-utos ng operasyon sa Mamasapano noong Enero na ikinasawi ng 44 na kasapi ng Special Action Force ng Philippine National Police.

Ani Purisima, hindi niya nabatid na nagsimula na ang operasyon ng SAF. Nasabihan umano siya ni SAF Director General Getulio Napeñas na nagsimula na ang operasyon Linggo na ng umaga.

Itinanong muli ni Senador Guingona kung may nababatid na operasyon ng Special Action Force si General Purisima. Sumagot ang nagbitiw ng PNP chief na wala siyang alam na nagsimula na ang operasyon.

Tinanong ni Senador Guingona si General Napeñas kung alam ni General Purisima anh operasyon at binasa niya ang text message ni Purisima sa kanya noong ika-19 ng Enero, anim na araw bago naglunsad ng operasyon.

Mga alas seis treinta y uno noong ika-19 ng Enero, nag-text umano si Purisima na nagtatanong tungkol sa kanyang balak. Sumagot umano siya at sinabing "Sir good pm. The plan for the operation is a go on the timeline which is January 23 to January 26. The troops will move from Zamboanga."

Idinagdag pa niya na walang problema sa target area at tuloy ang paghahanda upang matiyak na handa ang mga tauhan sa operasyon. Maganda rin umano ang lansangang daraanan, dagdag pa ni General Napeñas.

Itinanong muli ni Senador Guingona kung sino ang nag-utos sa kanya noong ika-25 ng Enero na pumasok sa Mamasapano, sinabi ni General Napeñas na walang direct order sa kanya at nakabase ang kanyang desisyon ayon sa kanilang patuloy na operasyong ginagawa.

Ginipit pa si General Napeñas kung sino ang nag-utos sa kanya at sinabi niyang walang sinomang nag-utos sa kanya base na rin sa naunang operasyong kanilang ginawa. Siya umano ang nagpatakbo aypm sa malatakdang impormasyon mula Enero 23 at ika-26 ng Enero base na rin sa kanyang text message na ipinadala kay General Purisima.