Obispo at kaparian ng Dipolog, umaasang maililigtas ang Italyanong dinukot
NAGPAHAYAG ng pagasa ang Obispo ng Dipolog, Bishop Severo C. Caermare at mga pari na maililigtas ang Italyanong si Rolando del Torchio na dinukot noong nakalipas na Miyerkoles ng gabi sa kanyang restaurant sa loob mismo ng Andres Bonifacio College Compound.
Sa isang pahayag ng mga nakasaksi, nagpanggap ang apat sa kidnappers na mga customer at ayon sa closed circuit television, at may pumasok na anim na iba pa at sapilitang isinama ang Italyano. Hinila siya at isinakay sa isang van patungo sa Boulevard sa Barangay Miputak. Nilagyan ng sako sa mukha ang biktima ay isinakay sa dalawang bangkang de motor at nawala na lamang sa karagatan.
Ayon sa Diocese of Dipolog, si9 G. Del Torchio, 56 taong gulang, ay isinilang noong ika-16 ng Nobyembre 1958 sa Angera, Varese, Northern Italy. Naordenan sa pagkapari sa Pontifical Institute ofr Foreign Missions at ipinadala sa Pilipinas. Naglingkod siya biulang Parochial Vicar ng Holy Cross Parish sa Siocon, Zamboanga del Norte noong ika-19 ng Pebrero 1990. Naglingkod siya sa Saint Joseph Chapel sa Sibuco sa ilalim ng Parokya ng Siocon.
Itinatag niya ang Farmers Training Cooperative Center, isang NGO na tumulong sa mga magsasaka sa Sibuco, Zamboanga del Morte. Umalis siya sa pagkapari noong 1996 at nanatili sa lalawigan at nagkaroon ng kanyang pizza restaurant na may pangalang UrChoice Bistro Cafre.
Humiling ng panalangin si Bishop Caermare sa mga mananampalataya upang mailigtas ang dinukot na dating misyonero. Nagpapasalamat din sila sa local government, sa pulis at militar na tumutulong sa pagsisiyasat.
Nilagdaan nina Fr. Leonilo Dagpin, Jr., vice chancellor at Bishop Caermare ang pahayag na ipinadala sa Catholic Bishops Conference of the Philippines.
Sa pinakahuling impormasyon mula kay G. Lorenzo Aseneiro, tagapagsalita ng Crisis Management Committee ng Dipolog, wala pang natatanggap na anumang balita o ransom demand mula sa mga dumukot sa dating misyonero hanggang sa mga oras na ito.
1 2 3
