NAGALAK si Japanese Prime Minister Shinzo Abe na siya ang naging kauna-unahang lider na nakadalaw sa Pilipinas ngayong 2017. Sa kanyang talumpati sa kanilang pag-uusap ni Pangulong Rodrigo Duterte, sinabi ni G. Abe na pinili niya ang Pilipinas na dalawing ngayong bagong taon upang patotohanan ang kanyang pangkong pag-iibayuhin ang relasyon ng dalawang bansa.
Karangalan umano niyang anyayahang dumalaw ngayong unang bahagi ng Enero.
Noong nakalipas na Oktubre, ani Prime Minister Abe, sinalubong niya si Pangulong Duterte sa Tokyo at nalulugod siyang makadalaw na muli sa Pilipinas sa loob lamang ng maiksing panahon.
Dadalaw din ang mag-asawang Abe sa Davao City. Suportado niya ang pamumuno ng Pilipinas sa Association of Southeast Asian Nations (ASEAN) ngayong 2017.
Kailangan umanong magtulungan upang malutas at matugunan ang mga hamon sa rehiyon. Umaasa rin si G. Abe na magiging maganda ang kanilang pag-uusap ni Pangulong Duterte.
Higit umanong lalakas ang mahalaga at napapanahong pagtutulungan, dagdag naman ni Pangulong Rodrigo Duterte. Mababatid ang mga paraan sa pagpapalakas ng mga kasunduan upang pakinabangan ng dalawang panig at mga mamamayan.
Kabilang sa mahahalagang paksa ang pagpapalakas ng kalakal at negosyo, pagpapasigla ng tanggulang pambansa, pagkakaroon ng matagalan at maasahang kapayapaan sa Mindanao, pagpapalakas na rin ng pagpapatupad ng batas laban sa kriminalidad at Pagtiyak ng kaligtasan sa pagdaragat at paglalayag.
1 2 3 
