Bentahan ng mga kotse, laglag na naman
SA ikalawang sunod na buwan, laglag na naman ang bentahan ng mga sasakyan sa Pilipinas. Ito ang ibinalita ng Chamber of Automobile Manufacturers of the Philippines Inc.
Mula Enero hanggang sa huling araw ng Abril, umabot sa 111,620 mga sasakyan ang nabili at mas mababa ito ng higit sa siyam na porsiyento mula sa 123,064 na sasakyang nabili noong nakalipas na taon.
Pinaka-apektado ang bentahan ng light trucks sapagkat mula sa 2,930 mga naipagbili noong 2017 umabot lamang sa 2,007 ang mga sasakyang nabili ngayong 2018 na kinakitaan ng pagbagsak ng may 31.5%. Ang mga Asian Utility Vehicles naman ay nabawasan ng may 24.2 persiyento sa bentang 18,612 units mula sa 24,550 noong nakalipas na taon. Ang commercial vehicles ay bumagsak din sa bentang 72,803 unit ngayong 2018 mula sa 81,251 unit noong nakalipas na 2017.
Ito ang pinakahuling datos ng nakamtan mula sa tanggapan ni Atty. Rommel Gutierrez, pangulo ng CAMPI sa kanyang ipinadalang impormasyon ngayon.
Ayon sa mga alagad ng industriya, ang dahilan ay ang bagong pagbubuwis na kilala sa pangalang TRAIN o Tax Reform for Acceleration and Inclusion na sinimulang ipatupad ng pamahalang Duterte mula noong unang araw ng Enero.
Kinakitaan ito ng pagtaas ng presyo ng mga bilihin at buwis sa mga karaniwang sasakyang binibili ng mga mamamayan.
1 2 3
