Kilala rin ang Labazhou bilang lugaw ng walong yaman o "eight-treasure porridge", na tumutukoy sa maraming masustansiyang sangkap sa lugaw na ito. Ang tipikal na paraan ng paggawa nito ay ang sumusunod: una, magkakasabay-sabay na pakuluan ang malagkit, millet, glutinous millet, kastanyas at pinatuyong dates; pagkatapos, isama ang mani, almond, walnut, melon-seed meat, ibang mga pinatuyong prutas at brown sugar para hindi lamang mapasarap, kundi mapasustansiya ang lugaw. Puwede ring samahan ng red beans, kidney beans, pine nuts, lotus seeds, o anumang sangkap na masustansya o masarap. Kaya, puwede ring mahigit sa walo ang sangkap ng eight-treasure porridge. Sa katotohanan, hindi limitado ang mga sangkap na nagagamit sa lugaw na ito. Dito, ang walo ay simpleng nangangahulugan ng marami. Hindi kataka-takang itinuturing ito sa tradisyonal na medisinang Tsino na isang uri ng pagkaing pampalusog na nakakabuti, lalo na sa spleen, sikmura at dugo.

Ngayon, naging pangkaraniwang pagkain na ang resipeng ito para sa mga Tsino. Sa katunayan, ganoon kasarap ang lugaw na ito na hinahaluan ng mga makulay at matamis na sangkap kaya ang pagkain nito ay hindi na limitado sa ika-8 araw ng ika-12 lunar month lamang. Nakikita ng mga Tsino ang eight-treasure porridge sa mga palengke at na-eenjoy nila ti sa buong taon.

Hindi malaman kung sino ang naka-imbento ng resipeng ito. Pero, may isang bagay na sigurado--na noong sinaunang panahon pa ay meron nang ganitong lugaw. Idinaraos ng mga tao ang seremonya sa huling buwan ng lunar year upang sambahin ang mga diyus-diyosan at ninuno upang matiyak ang mapayapang pamumuhay at masaganang ani sa susunod na taon.

Sinasabi ring ang popularidad ng aktibidad na ito ay utang sa Buddhism. Kilala rin ang ika-8 araw ng ika-12 buwan sa lunar calender bilang araw ng pagtatamo ng Buddha ng Buddhahood. Ayon sa isang alamat, bago matamo ni Sakyamuni ang Buddhahood, nagpalibut-libot siya sa India. Isang araw, labis siyang napagod at nagutom kaya hinimatay siya sa tabing-daan. Nakita siya ng isang shepherdess at binigyan siya nito ng pagkain. Bilang resulta, mabilis na namumbalik ang lakas ni Sakyamuni. Naligo siya sa isang kalapit na ilog at pagkatapos, umupo siya sa ilalim ng isang budhi tree. Sa ika-8 araw ng ika-12 buwan, natamo niya ang kanyang Buddhahood. Ang pagkaing ibinigay ng naturang shepherdess kay Sakyamuni ay gawa sa kanin at malagkit na hinaluan ng mga sariwang prutas na pinitas sa bundok. Mula noon, sinimulan ng mga tagasunod ni Sakyamuni na gamitin ang mga sariwang butil at prutas sa paggawa ng lugaw sa ika-7 araw ng ika-12 lunar month at lutuin ito hanggang madaling araw kinabukasan. Ang lugaw na ito ay simbolikal na ginagamit bilang handog sa Buddha.

Ang eight-treasure porridge ay unang nakilala sa Tsina sa panahon ng Song Dynasty noong mga 900 taon na ang nakararaan. Ayon sa nakasulat na rekord, ini-oofer daw ng malalaking Buddhist temple ang lugaw na hinahaluan ng ibang mga pampalasa sa araw na iyon upang maipakita ang kanilang pananampalataya sa Buddha. Sa Ming Dynasty noong 500 taon na ang nakalipas, naging isang banal na pagkain ang eight-treasure porridge at ibinibigay ito ng mga emperador sa kanilang mga opisyal sa panahon ng kapistahan. Samantalang natatamo nito ang mga popularidad sa feudal upper class, mabilis din naming nagiging popular din ito sa buong bansa.