 Matatagpuan sa pampang ng Huanhua Brook sa isang kanlurang kanugnog na purok ng Chengdu, ang Du Fu Thatched Cottage Museum ay hindi isang maliit na bahay sa literal na kahulugan nito. Ito ay isang commemorative museum na kinabibilangan ng isang tradisyonal na harding Tsino na itinayo sa isang lugar kung saan si Du Fu na isang makata noong panahon ng Tang Dinastiya (AD 760) ay nagtayo ng isang maliit na bahay na kugon para sa kanyang pamilya. Itinuturing na isa sa mga pinakadakilang makata ng Tsina, nagtamasa si Du Fu ng walang kupas na kabantugan. Ang kanyang mga tula ay matatagpuan sa mga teksbuk ng mga paaralan, at dapat makilala ng sinumang dayuhang estudyante ng literaturang Tsino ang kanyang mga akda.
Nabuhaya si Du Fu noong panahong nagsisimulang humina ang Tang Dinastiya. Naranasan niya ang digmaan kung saan nagsagupa ang dalawang rebeldeng heneral noong panahon ng AD 755-763, at puminsala sa maraming lugar ng bansa at humantong sa paghina ng Dinastiyang Tang.
Tubong Gongxian County ng Lalawigan ng Henan sa gitang Tsina, lumipat si Du Fu sa Chengdu noong AD 759 para umiwas sa digmaan.
Noong sumunod natagsibol, nagtayo siya ng isang maliit na dampang kugon sa tabi ng Flower Bathing Brook sa tulong na pinansyal ng isang kaibigan. Apat na taong siyang namuhay roon nang matahimik habang isinusulat ang 240 sa kanyang 1400 tula.
Kilala ang mga tula ni Du Fu sa maawaing paglalarawan ng mga pagdurusa at kapighatiang dinaranas ng mga tao sa harap ng kawalang-katarungan at korupsyon.
Noong AD 761, sinira ng isang bagyo ang bubungan ng kanyang bahay. Dahil dito, biglang sumagi sa isip niya ang kahirapan ng iba pang naghihikahos na iskolar. Dahil sa karanasang ito, sumulat siya  ng isang tula kung saan sinabi niyang maaari siyang mamatay nang kontento sa kanyang tumutulong bahay makahanap lang ng kanlungan ang mga sawing-palad.
Ang bahay ni Du Fu ay nawasak noong huling dako ng Tang Dinastiya. Noong AD 902, natagpuan ng isang makatang nagngangalang Wei Zhuang ang labi niyon at nagtayo siya ng bagong cottage sa naturang lugar. Sapul noon ay nakapagsagawa na ng mahigit 10 pangunahing renobasyon.
Sa kasalukuyan, ang Du Fu Thatched Cottage Museum ay binubuo ng ilang gusali na kinabibilangan ng Poetic History Hall, Shrine of Gongbu (opisyal na titulo ni Du Fu), Memorial Hall of Du Fu at isang replika ng bahay na kugon ni Du na itinayo noong 1907 nang alinsunod sa pagkakalarawan ng mga tula ni Du Fu.
May mga couplet sa lahat ng lugar, sa mga gracing gate, haligi at bulwagan. Pumupuri sa buhay, katauhan at literary achievement ni Du Fu, buong husay ang pagkakabuo ng mga  couplet, na kadalasay binubuo ng mga pangungusap mula sa mga pangunahing tula ni Du Fu.
Dahil sa mahalagang posisyon ni Du Fu sa kasaysayan ng literaturang Tsino, ang pagdalaw sa Du Fu Thatched Cottage Museum ay kailangang kailangan para sa mga bisistang ngayong lamang nakadalaw sa Chengdu.
Sa banayad na paglalakad-lakad sa museo, masisiyahan ang mga bisita sa aura ng matandang kultura, gayun din sa katahimikan ng kawayanan, na malayo sa magugulong lunsod.
|
