Nakaluklok sa Anxin County ng Lalawigang Hebei ang Lawang Baiyangdian na mahigit 160 kilometro ang layo mula sa Beijing. Umaabot sa 366 na kilometro kuwadrado ang lawak ng katubigan ng Baiyangdian, na kinabibilangan ng mahigit 140 lawa.

Tungkol sa Lawang Baiyangdian unang-una pag-usapan natin ang mga tambo rito, na siyang isang mahalagang bagay para sa Baiyangdian. Ayon sa mga residente rito, "Ang isang tambo ay kasinghalaga ng isang piraso ng ginto". Tuwing buwan ng Agusto at Setyembre ng bawat taon, hinog na ang tambo sa lawa, nagiging maginto ang kulay ng buong lawa. Talagang kayrikit ng tanawin. May tatlong uri ang tambo sa lawang Baiyangdian. Ang pangunahing klase ay ginagawang panabing, ang pangalawang uri ay ginagawang pangguhit sa handicraft at ang pangatlo ay ginagawang materyal sa paggawa ng papel at panggatong. Ang murang ugat ng tambo ay puwedeng gawing alak, samantalang ang magulang na ugat nito ay maaaring gawing gamot. Ang buhok ng tambo ay maaaring gawing walis at ang bilot nitong parang bulak ay puwedeng gawing palaman sa unan. May isang tindahang nagbebenta ng mga produktong handicraft mula sa tambo na ari ng isang naninirahan doon na nangangalang Yang Xue. Sinabi niyang hindi lamang gamit sa paggawa ng souvenir ang mga produktong yari sa tambo, meron din itong parktikal na gamit. Kung maaraw puwedeng magsuot ng sambalilong yari sa tambo para hindi gaanong mabilad sa araw. Gagasta lamang kayo ng ilang Yuan RMB at makabibili rin ng isang sapatos na yari sa tambo na masarap sa paa at magandang ilakad sa Lawang Baiyangdian. Sinabi ni Yang Xue na,

"Narito ang mga gawang kamay mula tambo. Yari sa kamay ang sapatos na tambo na hinubog sa pamamagitan ng mataas na temperatura. Kaya madaling pasukin ng hangin. Yari iyon sa tambong galing sa tubig na siyang katangi-tanging produkto sa Lawang Baiyangdian."

Bukod sa pagtanaw sa mga tambo, sa pamamasyal sa Lawang Baiyangdian, dapat ding pumunta sa garden ng mga pulidong produkto mula sa bulaklak ng lotus sa Lawang Baiyangdian. Ang lugar na ito ay sadyang binuksan ng pamahalaang lokal para tamnan ng mga lotus. Pagsapit ng tag-init, namumukadkad ang mga bulaklak ng lotus. Halos natatakpan na ng mga bulaklak ng lotus ang tubig sa hardin. Nagsisiksikan sa ibabaw ng tubig ang mga dahon ng lutos, sa pag-ihip ng mabining hangin, wari'y umiindak ang mga bulaklak sa lawa-lawaan. May isang makitid na daang bato sa lawa ng lotus kung saan puwedeng dumaan ang mga turista at kumuha ng mga larawan. Dahil natatakpan ng mga dahon at bulaklak ng lutos ang makitid na daang bato, hindi nakikita ang maliit na daan. Ang paglalakad dito ay parang paglalakad sa ibabaw ng mga bulaklak. Nagsadya dito ang isang taga-Beijing, si Miss Zhao Jie, sinabi niyang,

"Kay gandang pagmasdan ang gayon karaming barayti ng bulaklak ng lotus na hindi ko pa nakita noong. Kayririkit ng mga bulaklak ng lotus. Kumuha ako ng maraming larawan upang ipakita sa aking mga kaibigan."

Sa pagpunta sa Baiyangdian, hindi maaring hindi kayo kumain ng mga isda rito. Maraming klase ng isda rito, na masarap ang lasa at masustansiya. Kung may sapat na panahon, puwedeng sumama sa mga mangingisda ang mga turista, at pagkatapos ay pumunta sa kahit alin mang restawran at ipaluto sa kusinero doon ang nahuli nilang isda. May isang putaheng sa Baiyangdian na tinatawag na "Yiguoxian", tinatawag din itong tinapay na niluluto kasama ng maliliit na isda. Ang mga tinapay na ito ay gawa sa cornstarch, soya bean, millet, munggo at gawgaw mula sa water chestnut at lotus ng Baiyangdian. Ang mga maliit na isda na isang pulgada lamang ang laki ay likas na lumalaki sa katubigan ng Baoyangdian. Sinabi ng may ari ng isang pansiteriya na si Wang Dongmei na,

"Ang lahat ng ito'y sarili naming tanim. Pagkatapos gagawin naming tinapay ang gewgaw mula sa mais, ihahalo ang maliliit na hipon sa gawgaw at gagawing tinapay, medyo maalat ang lasa. Sa pagsakay sa maliit na bangka at pagkain ng maliliit na isda at tinapay, doon mo lang mararamdaman ng nasa Baiyangdian ka."

Sinumang gustong kumain ng mamahaling putahe sa Baiyangdian, ay dapat pumunta sa Shan Yuan Zhuang Restawran. Kilalang-kilala dito ang putaheng puro isda. Sa kasagsagan ng panahon ng turismo,punong puno ng mga tao ang naturang restawran.. Makalalasap sa naturang restawran ang mga turista alinsunod sa sarili nilang kagustuhan ng iba't ibang lutuing isda. Sana'y matikman ninyo ang masasarap na pagkaing isda dito.