Narinig ninyo ang "Walang Hanggang Ako ay Aawit." Kung masasabing ang mga awitin kahapon ay handog, pangunahin na, sa mga nasawi sa lindol para sumalangit nawa ang kanilang kaluluwa, ngayong gabi naman, tulad ng sinabi ng ating loving DJ na si kuya ramon, habang ipinagdarasal natin ang mga hindi pinalad na makaligtas, dapat sigurong pagtuunan din natin ng pansin iyong mga biktimang nakaligtas nga pero nasaktan naman o kung hindi naman ay nawalan ng mahal sa buhay o ari-arian. Sang-ayon dito si Mark Carpio, puno ng Madz.

Iyan, narinig ninyo ang choral rendition ng awiting "Pinasisigla Mo Ako" (You Raise Me Up) . Harinawa, ang mga awiting ito ng Madz, kasabay ng mga tulong na nagmumula sa loob at labas ng Tsina, ay makapagbigay ng lakas ng loob doon sa mga nakaligtas sa kalamidad na magpahanggang ngayon ay taglay pa rin sa ala-ala ang nasiphayong mga pangarap ng mga nasawi.

Narito ang Kanyang Kamahalan Sonia Cataumber Brady, Embahador ng Pilipinas sa Tsina na nagpapahayag ng matibay na suporta ng panig Pilipino.

Kayo ay nasa himpilang China Radio International at sa programang Gabi ng Musika ng Serbisyo Filipino. Ito si XJ. Ipinapaalala ko na inihahatid namin sa inyo ngayong gabi ang klip ng konsiyerto ng Madz na handog sa mga nabiktima ng lindol sa Sichuan. Ang karirinig ninyo ay ang "Kahit na Magtiis".

Sa konsiyerto noong nakaraang Huwebes, nagtanghal din ang grupong Tsinong Voice of Friendship. Bilang pagpapahayag ng pasasalamat sa mga ibinibigay na tulong ng panig Pilipino, inawit ng nasabing grupo ang Chinese version ng "Magtanim ay Di Biro." Kasiyahan natin ito.

Tulad ng ipinaaabot na mensahe ng nasabing awitin--Magtanim ay Di Biro--nahihirapan ang mga nilindol na lugar sa rekonstruksyon at rehabilitasyon. Gayunpaman, malalampasan ang anumang kahirapan kung may tiyaga at pagpupursigi na gaya ng ipinahihiwatig ng awiting "Abutin ang Layo" o Go the Distance. Bago natin pakinggan ang kantang ito, naritong muli si G. Feng Zuoku, pangalawang puno ng CPAFFC, na nagpapahayag ng kanyang kompiyansa na sa malao't madali, malalampasan din ang kalamidad.

Bukod sa pagbibigay ng morale booster sa mga kababayang Tsino na apektado ng lindol, gusto rin naming magpahayag ng aming taimtim na pasasalamat sa ipinagkaloob na tulong ng Pilipinas para makapaghatid kami ng dalawang espesyal na edisyon ng Gabi ng Musika. At diyan sa puntong iyan nagtatapos ang ating palatuntunan sa gabing ito. Itong muli si XJ, maraming maraming salamat at mabuhay!