MGA PAARALAN, TUMUTUPAD SA ALITUNTUNIN SA MGA GUSALI. Ligtas at binabantayan ng Department of Education ang kanilang mga gusali. Ito ang sinabi ni Education Secretary Bro. Armin F. Luistro, FSC (gitna) sa isang panayam sa Luneta Hotel kaninang umaga. Kahit ang mga gusaling itinayo ng mga politiko ay sinusuri ng mga enhinyero, dagdag pa ni Secretary Luistro. Nasa larawan din si Commissioner Cynthia Bautista ng CHED (kanan) at Philippine Star Columnist marichu Villanueva (nakatalikod sa camera). (Melo M. Acuna)
TINIYAK ni Education Secretary Bro. Armin A. Luistro, FSC na ligtas ang mga gusaling ginagamit ng mga mag-aaral sa iba't ibang bahagi ng bansa.
Ito ang kanyang tugon matapos lumabas ang balitang nais ni Pangulong Benigno Simeon C. Aquino III na mabatid kung ligtas ang daan-daang libong mga gusali sa bansa matapos ang malagim na sunog sa Valenzuela City noong nakalipas na buwan na ikinasawi ng 72 katao.
Sa isang panayam kay Kalihim Luistro, sinabi niyang sumusunod ang Department of Education sa mga alituntunin ng pamahalaan hinggil sa kaligtasan ng mga gusali at ng mga mag-aaral, lalo't higit ang mga bagong tayong paaralan.
Ipinaliwanag pa niyang ang mga gusaling itinayo ng mga mambabatas at pamahalaang lokal ay sumusunod rin sa batas. Ang mga enhinyero ng mga bayan at lungsod ay patuloy sa kanilang inspeksyon at pagsusuri sa mga gusaling ito.
Samantala, handa ang Department of Education na sagutin ang lumabas na findings ng Commission on Audit sapagkat nagkamali ang ahensya sa pagsasabing nagkakahalaga ng P608 milyon ang mga lumang aklat sa bagong curriculum sa ilalim ng K+12.
Ani Kalihim Luistro, ang ginamit para sa Grade 1 at Grade 7 na mga aklat ay bahagi lamang ng buong halaga. Tutugon sila sa anumang katanungang magmumula sa Commission on Audit.
Kahit umano sa mga pribadong paaralan ay walang nagtapon ng mga sinaunang aklat sa pagsisimula ng bagong curriculum. Marahil, ani Kalihim Luistro, ay hindi nauunawaan ng kinauukulan na nagagamit pa ang mga lumang aklat depende sa mga pahina nito. Marami pang mapupulot na imporasyon sa mga aklat na ginamit sa ilalim ng sinaunang curriculum.
