Ipinahayag kahapon, Huwebes, ika-14 ng Hulyo 2016, ni Yang Jiechi, Kasangguni ng Estado ng Tsina, na ilegal at walang-bisa ang resulta ng South China Sea arbitration.
Sinabi ni Yang, na ang pagharap ng arbitrasyon ng pamahalaan ni dating Pangulong Benigno Aquino III ng Pilipinas ay labag sa bilateral na kasunduan ng Tsina at Pilipinas hinggil sa paglutas sa hidwaan sa South China Sea sa pamamagitan ng talastasan. Labag din aniya ito sa Declaration on the Conduct of Parties in the South China Sea, at mga pandaigdig na batas na kinabibilangan ng United Nations Convention on the Law of the Sea (UNCLOS). Kaya ani Yang, ilegal ang naturang arbitrasyon mula noong simula pa.
Tinukoy ni Yang, na ang naturang arbitrasyon ay paraan din ng iilang bansa sa labas ng rehiyong ito, para makialam sa isyu ng South China Sea. Aniya, nitong ilang taong nakalipas, batay sa sariling interes, nakikialam sa isyu ng South China Sea ang iilang bansa, sa pangangatwiran ng "kalayaan sa nabigasyon" at "pangangalaga sa kapayapaan." Sinabi ni Yang, na di-responsable ang aksyong ito, nagpapasidhi ito ng kalagayan sa South China Sea, at nagdudulot ng krisis sa rehiyong ito. Dagdag niya, ang isyu ng South China Sea ay isyu sa pagitan ng mga bansa sa baybayin ng karagatang nabanggit, at ang isyu ay dapat lutasin sa pagitan ng naturang mga bansa.
Ipinahayag din ni Yang ang kahandaan ng Tsina, na batay sa katotohanang pangkasaysayan at alinsunod sa UNCLOS at mga iba pang pandaigdig na batas, mapayapang lutasin, kasama ng mga may direktang kinalamang bansa, ang hidwaan sa South China Sea, sa pamamagitan ng talastasan. Ito aniya ay para pangalagaan ang kapayapaan at katatagan sa karagatang ito.
Salin: Liu Kai
