Bilang ng mga turistang Tsino sa Pilipinas sa 2016, lalampas sa inaasahan: target para sa 2017, 1 milyon

Si Neil Ballesteros ay bumigkas ng talumpati 

"As of September [2016], na-beat na natin iyong last year's arrivals," ito ang ipinahayag, Disyembre 28, 2016 ni Neil Ballesteros, Tourism Attache ng Pilipinas sa Tsina, sa "Year-end Appreciation Dinner" na ginanap sa Hilton Hotel, Beijing.
Sinabi ni Ballesteros na noong nakaraang taon, 490,841 ang bilang ng mga Tsinong bumisita sa Pilipinas, pero ngayong 2016, Setyembre pa lamang ay mayroon nang 537,000. 

Aniya pa, dahil sa pagbisita ni Pangulong Rodrigo Roa Duterte sa Tsina ngayong taon, ang relasyon ng dalawang bansa ay naibalik sa pagiging matalik na magkaibigan.
Ang target Chinese tourist arrivals ng Department of Tourism (DoT)-Beijing Office ngayong taon ay 550,000, at buong pagmamalaking sinabi ni Ballesteros na malaki ang posibilidad na malampasan ito, at posibleng umabot pa sa 580,000 hanggang 600,000.
Para sa susunod na taon, ang target Chinese tourist arrivals ng Pilipinas ay 1 milyon, dagdag ni Ballesteros.

Si Neil Ballesteros, kinapanayam ni Rhio Zablan mula sa CRI

Sinabi rin ng tourism attache na, sa ngayon, naghahanda na ang Pilipinas sa pagtanggap ng 1 milyong turistang Tsino para sa susunod na taon.
Aniya pa, nangako rin ang Pamahalaang Tsino na tutulong upang dagdagan ang mga lipad ng mga Chinese airlines papunta sa Pilipinas upang magkaroon ng mas maluwag na linya ng transportasyon tungo sa maraming destinasyong panturista sa Pilipinas.
Ani Ballesteros, para maabot ang target na 1 milyong turistang Tsino sa susunod na taon, kailangang magkaroon ng 210 lipad ng mga eroplano papuntang Pilipinas kada linggo.

Si  Rhenita B. Rodriguez(kanan), nasa talumpati

Sa kanya namang pambungad na talumpati, ipinahayag ni Rhenita B. Rodriguez, Minister/Consul ng Embahada ng Pilipinas sa Beijing, ang taos-pusong pasasalamat sa mga turistang Tsino, sa kanilang pagpili sa Pilipinas bilang destinasyon sa kanilang bakasyon.
Ani Rodriguez, ipagpapatuloy ng Pamahalaan ng Pilipinas ang paghahanap ng ibat-ibang paraan upang gawing madali, mas komportable at kaaya-aya ang pagbisita ng mga Tsino sa Pilipinas.
Sinabi niyang malaking pagpapahalaga ang inilalagay ng Pilipinas sa partnership nito sa Tsina at mga mamamayan nito.
"Sa pagbisita ng mga Tsino sa Pilipinas, nais naming ipabatid at iparamdam sa kanila na - It's Really More Fun in the Philippines," dagdag ni Rodriguez

Ang nasabing "Year-end Appreciation Dinner" ay idinaos sa pagtataguyod ng DoT-Beijing Office at dinaluhan ng mga Chinese travel companies, opisyal Pilipino, media, at iba pang mga kaibigang Tsino.

Article: Rhio
Photo: Wang Le