Ipinahayag ni Yi Gang, Gobernador ng People's Bank of China (PBC), bangko sentral ng bansa na pinapatupad ng kanyang bangko at ibang mga institusyong pinansyal ng Tsina ang pangako ng pangulong Tsino sa taunang pulong ng Boao Forum for Asia (BFA) nitong nagdaang Abril, na ibayo pang mapaginhawa ang pagpasok sa pamilihang Tsino ng mga dayuhang bangko, dayuhang kompanya ng seguro, at dayuhang kompanya ng securities. Natamo nito ang konkretong progreso, diin ni Yi.
Winika ito ni Yi nitong Huwebes, Mayo 30 sa 2019 Annual Conference of Financial Street Forum sa Beijing. Dagdag ni Yi, sa kasalukuyan, binibigyan ng PBC ng national treatment ang mga dayuhang institusyong pinansyal sa larangan ng credit inquiry, credit rating, pagbabayad, at iba pa.
Ayon sa pinakahuling datos, hanggang Abril, 2019, 215 bangkong dayuhan mula sa 54 na bansa't rehiyon ang nagbukas ng sangay o ahensiya sa Tsina. Samantala, 59 na sangay at 14 na ahensya ang nabuksan sa Tsina ng mga dayuhang kompanya ng seguro mula sa 16 na bansa't rehiyon.
Sinabi naman ni Matthew Rous, Punong Tagapagpaganap ng China-Britain Business Council (CBBC), na sapul nang ipatalastas ng pamahalaang Tsino ang ibayo pang pagbubukas, maraming institusyong pinansyal ng Britanya, lalo na mga kompanya ng pangangasiwa sa ari-arian at kompanya ng seguro, ang nagsusuri sa pamilihang Tsino. Dagdag pa niya, para sa nasabing kompanyang Britaniko, ang Belt and Road Initiative (BRI) ay napakahalagang pagkakataon. Diin ni Rous, sa proseso ng magkakasamang pagpapasulong ng BRI, kinakailangan ang propesyonal na serbisyong pinansyal, kung saan magaling ang mga institusyong pinansyal ng Britanya.
Ang Financial Street ay matatagpuan sa Xicheng District ng Beijing, kung saan nakahimpilan ang maraming kilalang institusyong Tsino't dayuhan. Ipinahayag ni Yi ang suporta ng pamahalaang Tsino sa pagsasagawa ng mga pilot project sa sektor pinansyal sa Financial Street.
Salin: Jade
Pulido: Mac
