Ipinadala Martes, Disyembre 31, 2019 nina Pangulong Xi Jinping ng Tsina at Pangulong Vladimir Putin ng Rusya ang mensaheng pambagong-taon sa isa't-isa.
Sa mensahe, sa ngalan ng pamahalaan at mga mamamayang Tsino, ipinaabot ni Xi ang taos-pusong pagbati kay Pangulong Putin at mga mamamayang Ruso. Ani Xi, sa taong 2019, nilagdaan at ipinalabas ng dalawang bansa ang magkasanib na pahayag tungkol sa pagpapalakas ng estratehikong katatagan sa kasalukuyang daigdig. Ito aniya ay nagpapakita ng matatag na determinasyon ng dalawang bansa sa magkasamang pangangalaga sa estratehikong katatagan ng buong mundo.
Sinabi ni Xi na sa magtatapos na 2019, natamo ng Tsina at Rusya ang kapansin-pansing bunga sa mga larangang gaya ng kabuhayan at kalakalan, enerhiya, kultura, siyensiya't teknolohiya. Ito ay nakakapaghatid ng aktuwal na kapakanan sa dalawang bansa at kanilang mga mamamayan, at nakakapagbigay ng napakalaking ambag para sa kapayapaan at kaunlarang pandaigdig, dagdag niya.
Sa kanya naming mensahe, bumati si Putin ng Manigong Bagong Taon kay Xi at mga mamamayang Tsino. Ipinahayag niya na sa ilalim ng magkasamang pagsisikap sa 2019, natamo ng komprehensibo't estratehikong partnership ng dalawang bansa ang napakalaking progreso. Nananalig aniya siyang sa magkasamang pagsisikap ng dalawang panig, walang humpay na susulong ang komprehensibong kooperasyong Ruso-Sino at konstruktibong pagtutulungan sa mga suliraning pandaigdig.
Salin: Li Feng
