Ang kasalukuyang taon ay ika-70 anibersaryo ng pagkakatatag ng relasyong diplomatiko ng Tsina at Rusya. Sa taong ito, madalas na nagtagpo sina Pangulong Xi Jinping ng Tsina at Pangulong Vladimir Putin ng Rusya. Sa harap ng mabilis na pagbabago ng kayariang pandaigdig, magkasama at puspusang nagsisikap ang Tsina at Rusya para sa pagtatatag ng Komunidad ng Pinagbabahaginang Kapalaran ng Buong Sangkatauhan.
Noong nagdaang Abril ng taong ito, sa pagtatagpo ni Xi at Putin sa Beijing, lubos na pinapurihan ng una ang relasyong Sino-Ruso. Noong nagdaang Hunyo, sa kanyang biyahe sa Rusya, magkasamang lumagda sina Xi at Putin sa magkasanib na anunsyo tungkol sa pagpapaunlad ng komprehensibo't estratehikong partnership sa bagong siglo at pagpapalakas ng kasalukuyang estratehikong katatagan sa buong mundo, bagay na nagpasimula ng bagong siglo ng relasyong Sino-Ruso.
Bunga ng mahigpit na pagpapalagayan at estratehikong patnubay ng dalawang lider, natamo ng relasyong Sino-Ruso ang kapansin-pansing bunga. Noong unang dako ng Disyembre, 2019, sa video meeting nina Xi at Putin, magkasama silang sumaksi sa pagsasaoperasyon ng natural gas pipeline ng Tsina at Rusya sa silangang ruta. Bukod dito, matatag na isinusulong ang mga malalaking proyektong pangkooperasyon ng dalawang bansa.
Nang balik-tanawin ni Wang Yi, Kasangguni ng Estado at Ministrong Panlabas ng Tsina ang diplomasyang Tsino sa taong ito, lubos niyang pinapurihan ang relasyong Sino-Ruso na nagsisilbing pinakamahigpit, pinakamatibay, pinakamahusay, at pinakamatatag na relasyon ng malalaking bansa.
Salin: Li Feng
