Nitong nakalipas na ilang araw, magkakasanib na nagpadala ng liham kay Carrie Lam, Punong Ehekutibo ng Espesyal na Rehiyong Administratibo ng Hong Kong (HKSAR) ang ilang pulitikong dayuhan, at lantaran silang nakialam sa mga suliranin ng Hong Kong. Upang manggulo sa Hong Kong at humadlang sa pag-unlad ng Tsina, ginamit ng ilang pulitikong dayuhan ang iba't ibang paraan, at ang nasabing liham ay isa pang bagong kilos nila na naglalayong magpataw ng presyur sa pamahalaan ng HKSAR, at makialam sa mga suliraning panloob ng Tsina.
Di-totoo ang lahat ng mga akusasyon sa naturang liham. Nagbulag-bulagan ang ilang pulitikong dayuhan sa karahasan ng mga radikal, sa halip, binatikos nila ang legal na aksyon ng pagpapatupad ng batas ng mga pulis ng Hong Kong. Talagang binaligtad nila ang tama at mali. Sa katunayan, laging nagtitimpi ang mga pulis ng Hong Kong, at pinanumbalik nila ang kaayusan ng lipunan, sa pamamagitan ng pinakakaunting sandatahang lakas.
Higit sa lahat, iniharap ng naturang mga pulitikong dayuhan ang di-makatwirang kahilingan na itayo ng komunidad ng daigdig ang pandaigdigang nagsasariling mekanismo ng imbestigasyon, para imbestigahan ang pagpapatupad ng batas ng mga pulis ng Hong Kong. Ang Hong Kong ay nabibilang sa Tsina, walang anumang kuwalipikasyon ang puwersang panlabas na magsagawa ng umano'y imbestigasyon sa mga suliraning panloob ng Tsina!
May lubos na kakayahan ang Tsina sa pangangalaga sa kasaganaan at katatagan ng HKSAR. Dapat maintindihan ng ilang pulitikong dayuhan ang kalagayan, at itigil ang walang pasubaling pakikialam sa mga suliranin ng Hong Kong. Hinding hindi magsisilbing pamato nila ang Hong Kong para sa pagtutulak ng sarili nilang interes.
Salin: Vera
