NANGAKO si Kalihim Albert F. Del Rosario na makikipagtulungan sa tanggapan ni Congressman Walden F. Bello upang magkapalitan sila ng datos sa mga nagaganap sa ilang mga embahada ng bansa sa Gitnang Silangan.
Sa isang press briefing, sinabi ni Kalihim Del Rosario na nagpulong sila ng mambabatas sa loob ng dalawang oras upang makatagpo ng epektibong paraan upang mabatid ang katotohanan sa mga alegasyong mayroong mga kawani ng mga embahada ng Pilipinas na diumano'y nang-aabuso ng mga manggagawang nagnanais nang umuwi sa Pilipinas.
KALIHIM DEL ROSARIO: MAGSISIYASAT KAMI. Ito ang pagtiyak ni Kalihim Albert F. Del Rosario sa mga mamamahayag matapos lumabas ang balitang may mga tauhan ng mga Embahada ng Pilipinas sa Gitnang Silangan na sangkot sa ilang ilegal na gawain. Pinasalamatan niya si Congressman Walden F. Bello sa pagbibigay ng kaukulang datos sa kanyang tanggapan kaninang umaga. (File Photo)
Magiging transparent ang pagsisiyasat at mababatid ng madla ang anumang madidiskubre sa mga gagawing pagtatanong.
Nakiusap din si Kalihim Del Rosario sa mga mamamahayag na huwag nang palakihin pa ang kwento sapagkat wala pang mga prueba na nakararating sa kanilang tanggapan. Wala pa ring pormal na reklamong nakararating sa Kagawaran ng Ugnayang Panglabas. Niliwanag din ni Kalihim del Rosario na inilabas umano ni Congressman Bello ang impormasyon sapagkat nakarating na umano ang balita sa Kagawaran subalit walang kumilos man lang. Idinagdag pa niya na hanggang kahapon lamang niya nabatid ang mga ibinibintang. Nagmula umano ang impormasyon sa isang mataas na opisyal ng Kagawaran ng Ugnayang Panglabas na nababahala na masira ang imahen ng tanggapan.
Kilala naman umano ni Kalihim del Rosario ang high-ranking official ng kagawaran na naglabas ng impormasyon. Wala naman siyang balak na ipatawag ang opisyal upang komprontahin. Aalamin na lamang niya ang katotohanan sa likod ng mga alegasyon.
Mahiwaga pa rin kay Kalihim del Rosario ang balita sapagkat ang impormasyon ay pawang tsismis lamang. Para sa kalihim, mahirap maganap ang "Sex to fly arrangement" o pagkakaroon ng ticket sa eroplano na ang kapalit ay sex.
Anang kalihim, mahirap itong maganap sapagkat ang ginagastusan ng pamahalaan ang repatriation. Sapagkat ito'y walang bayad, wala itong anumang kapalit. Batid ng lahat ng Pilipino sa kanyang mga pagdalaw sa Gitnang Silangan na ang repatriation, gaano man kamahal ay sagot ng pamahalaan.
May isang pangalan ng naibigay sa kagawaran at kanilang aanyayahan upang magbigay ng kanyang salaysay ayon sa kanyang karanasan o kaalaman.
Unang ibinunyag ni Congressman Walden Bello ang balita tungkol sa mga pang-aabuso kahapon sa isang press briefing.
1 2 3 4
