Professor Lydia Jose: Bilateral meetings mahalaga
BUKOD sa plenaryo ng Association of Southeast Asian Nations, ang mahalaga ay ang mga pagpupulong ng iba't ibang plataporma upang makapag-usap ang mga pinuno ng mga bansa. Hindi makikita ang resulta ng mga pagpupulong sa plenaryo kungdi sa mga bilateral meetings sa pagitan ng iba't ibang pinuno ng bansa.
MAS MAHALAGA ANG MAGAGANAP NA BILATERAL MEETINGS. Ito ang paniniwala ni Prof. Lydia Jose na mula sa Department of Political Science ng Ateneo de Manila University. Naniniwala siyaang magiging maganda ang patutunguhan ng pagdalaw ni Pangulong Xi Jinping sa Indonesia at Malaysia na may kinalaman sa posibleng paglahok sa Trans Pacific Partnership Agreement. (Melo M. Acuna)
Ayon kay Professor Lydia Jose ng Department of Political Science ng Ateneo de Manila University, makikita ang mga nagawa ng ASEAN sa kanilang website lalo na sa mga resolusyon at mga pahayag. Bagama't isang samahan itong napakaluwag, ito rin ang pinakalakas nito sapagkat tumagal na ito ng halos 50 taon sa estratehiya na nagiging matibay ang samahan sa pamamagitan ng consensus building. Ang ASEAN ang humalili sa SEATO at MaPhilIndo noong dekada sisenta, kahit pa maraming nagduda na magtatagal ang samahan.
Umaasa rin siyang mabubuo ang ASEAN Community sa taong 2015.
Tungkol sa pagdalaw ni Pangulong Xi Jinping ng Tsina sa Malaysia at Indonesia, maaaring makasama na ang pinakamalaking bansa sa Asia sa Trans-Pacific Partnership Agreement sapagkat mas magiging mas seryoso ang samahang ito kaysa sa Asia Pacific Economic Cooperation.
Mas magandang sumama na ang Tsina sa Trans-Pacific Partnership Agreement ngayon upang makasama sa pagbalangkas ng mga regulasyon sa mas malawak na samahan.
Kung magaganap ang pag-uusap ni Pangulong Aquino at Pangulong Xi Jinping sa ASEAN, magandang pag-usapan nila ang pagkakalakal ng mga Tsino sa Pilipinas, pagbabawas ng tensyon sa South China Sea, mas magandang pagtrato sa mga manggagawang Pilipino sa Tsina at pag-unawa sa mga drug mule, maghain ng ilang "concessions" para sa ikabubuti ng magkabilang panig.
1 2 3 4 5 6
