Kapayapaan, mithi pa rin ng bayan

Kapayapaan, mithi pa rin ng bayan

KAILANGANG MAKARATING ANG MGA PROYEKTO SA KANAYUNAN. Sinabi ni Chair Loretta An P. Rosales na ang mga programang ito ang kailangan upang makarating ang kaunlaran at maibsan ang mga isyu ng mga rebelde. Sumang-ayon naman si dating Interior and Local Government Secretary Rafael M. Alunan III (gawing kanan) sa obserbasyong magpapatuloy ang karahasan kung mayroong 'di pagkakatugma ng mga gawain ang pambansa at pamahalaang lokal. (Raymond Bandril)

SUMUSUNOD ANG PULISYA SA BATAS. Binigyang pansin ni Chief Supt. Reuben Theodore Sindac, tagapagsalita ng Philippine National Police na hindi sila nagpapabaya sa mga inirereklamong mga tauhang lumalabas sa Karapatang Pangtao. May mga naitalang paglabag ang mga pulis sa itinatadhanan ng batas, ayon kay CHR Chair Loretta Ann P. Rosales. (Raymond Bandril)

ALITUNTUNIN NG KORTE SUPREMA, IGINAGALANG NG SANDATAHANG LAKAS. Sinabi ni Lt. Col. Ramon Zagala, tagapagsalita ng Armed Forces of the Philippines na tumalima ang kanilang tanggapan sa kautusan ng Korte Suprema na ipagkaloob na ang mga dokumentong may kinalaman sa pagsisiyasat sa usapin ng nawawalang si Jonas Burgos na diumano'y dinukot ng mga military ilang taon na ang nakalilipas. (Raymond Bandril)

NADAKIP NA MAG-ASAWANG TIAMZON, NAKIKIPAG-USAP SA KANILANG ABOGADO. Makikita sa larawan ang mag-asawang Benito at Wilma Tiamzon na sinasabing pinuno ng mga rebeldeng komunista sa Pilipinas bago isinagawa ang kanilang inquest sa harapan ng taga-usig ng Kagawaran ng Katarungan sa Campo Crame kaninang umaga. Nadakip ang mag-asawa at ilang mga kasama noong Sabado ng hapon sa Cebu. (PNP Photo)

SA likod ng pagkakadakip sa mag-asawang Benito at Wilma Tiamzon noong Sabado at sa pahayag ng Malacanang na malaking kawalan sa kilusang armado ng Communist Party of the Philippines, malaking hamon pa rin sa pamahalaan kung paano matutuldukan ang pag-aaklas ng mga gerilya sa kanayunan.

Ito ang pananaw ni Commission on Human Rights Chair Loretta Ann P. Rosales, dating Interior and Local Government Secretary Rafael M. Alunan III at maging ni Lt. Col. Ramon Zagala, tagapagsalita ng Armed Forces of the Philippines sa idinaos na Tapatan sa Aristocrat kaninang umaga.

Bagaman, sinabi ni Lt. Col. Zagala na isang malaking dagok ang pagkakadakip sa mag-asawang Tiamzon at mga kasama sa pagkilos ng New People's Army sa mga lalawigan.

Kailangang makarating ang mga palatuntunang pangkaunlaran sa kanayunang kinaroroonan ng mga rebelde. Sa pagkakaroon ng pagbabagong-anyo sa buhay ng mga mamamayan, malulutas ang pinaka-ugat ng insurgency sapagkat mapapawi na ang kahirapan.

Halos magkatulad ang pananaw nina Chair Rosales at G. Alunan sapagkat napuna nila na hindi naipatutupad ang mga programang tutugon sa mga isyu ng mga rebeldeng komunista at maging mga Muslim na nagnanais humiwalay sa bansa.

Ayon kay Chair Rosales, tanging ang Kagawaran ng Katarungan ang makakapagsabi kung magagamit ang Joint Agreement on Safety and Immunity Guarantees (JASIG) na pinagkasunduan ng National Democratic Front/Communist Party of the Philippines/New People's Army at ng Pamahalaan ng Pilipinas sapagkat umalis sa pakikipag-usap sa pamahalaan ang mga rebelde kamakailan sa pagsasabing makikipag-usap na lamang sila sa hahaliling pangulo ng bansa sa ika-30 ng Hunyo, 2016.

Sinabi naman ni dating Commission on Human Rights Commissioner Nasser A. Marahomsalic na ang kapayapaan sa Mindanao ay matatamo sa oras na maging maganda ang batas na sasaklaw sa Bangsamoro.

Ani Atty. Marahomsalic, sa oras na maging maganda ang batas at makapasa sa Kongreso at malagdaan ni Pangulong Aquino at hindi na magkaroon ng problema sa Saligang Batas, ito na ang pinakamagandang pagkakataon para sa mga Bangsamoro na hindi nararapat hadlangan ninoman.

Kung sa kriminalidad, sinabi ni Chief. Supt. Reuben Theodore Sindac, tagapagsalita ng Philippine National Police na may kaukulang hakbang ang kanilang tanggapan laban sa mga lumalabag sa Karapatang Pangtao. Ito ang kanyang reaksyon sa pahayag ni Chair Loretta Ann P. Rosales na hindi mawala sa kanyang gunita ang mga ginagawa ng ilang mga pulis na gumagamit ng iba't ibang paraan sa pagsisiyasat ng krimen.