Magpapatuloy ang Simbahan sa misyon nito
MATAPOS lumabas ang desisyon ng Korte Suprema noong nakalipas na linggo na nagsasabing ayon sa Saligang Batas ang kontrobersyal na Reproductive Health Law matapos alisin ang ilang bahagi nito, ilang mga obispo ang nagsabing magpapatuloy sila sa pagtuturo hinggil sa kasagraduhan ng buhay.
Para kay Legazpi Bishop Joel Z. Baylon nararapat lamang ipagpatuloy ng Simbahan ang kanyang gawain sa pagsusulong ng kagandahan, dignidad at kahalagahan ng buhay na alay ng Diyos sa sangkatauhan. Pananagutan ng Simbahan, ayon kay Bishop Baylon, na ipagtanggol ang mga itinuturong ito mula sa lahat ng panganib. Nararapat ding harapin ang pamahalaan sa pamamagitan ng pagbabantay sa paraan ng pagpapatupad ng Reproductive Health Law.
Para kay Basilan Bishop Martin Jumoad, ang desisyon ng Korte Suprema ay isang "win-win solution." Anang obispo, ang mga ipinaglalaban ng Simbahan ay kinilala at iginalang sa pagdedeklarang taliwas sa Saligang Batas ang walong probisyon ng batas sa implementing rules and regulations.
Idinagdag pa ni Bishop Jumoad na obligasyon ng Simbahan na manindigan sa mga isyung moral lalo't higit sa kaluwagang isinusulong ng RH Law.
Para kay Malaybalay Bishop Jose Cabantan, hindi nakasalalay ang mga isyung moral na pinaninindigan ng Simbahan sa civil law kaya't ipagpapatuloy ang pagtuturo sa mga mamamayan bilang moral at spiritual agents sa panahong ito.
Ayon kay Calbayog Bishop Isabelo C. Abarquez, ipagpapatuloy nila ang pagtuturo ng Mabuting Balita "in and out of season."
1 2 3 4
