Pagawaing bayan, prayoridad ng Pilipinas
MGA pagawaing bayan ang prayoridad ng Pilipinas upang maipagpatuloy ang pag-unlad ng ekonomiya ng bansa.
Sa idinaos na Philippine Economic Briefing sa Philippine International Convention Center, sinabi ni Socio-Economic Planning Secretary Arsenion M. Balisacan, mayroong critical role ang mga pagawaing bayan sa kaunlaran at competitiveness ng bansa at maging sa major economic sectors.
Mahalaga ito sapagkat makababawas ito ng kahirapan, makatitiyak ng kaligtasan ng mga mamamayan at mga komunidad tulad ng mga ari-arian at hanapbuhay sa oras ng mga kalamidad.
Idinagdag pa niya na palalaguin ang paggasta sa mga pagawaing bayanmula sa 2.2% ng GDP at nais na marating ang 5.0% sa taong 2016.
Sa taong 2013 hanggang 2016, ang mga programa at proyekto sa mga pagawaing bayan ay mayroong 952 proyekto na may investment requirements na aabot sa US$46.69 bilyon o P 2.06 trilyon, na kinabibilangan ng capital infrastructure projects.
Upang higit na mapasigla ang PPP at higit na mapaganda ang bansa sa private sector investors, pinagbalik-aralan, sinusugan at sinangayunan ang mga pamamalakad ng pamahalaan sa magiging papel ng pribadong sektor tulad ng Implementing Rules and Regulations ng Build-Operate-Transfer Law at ang JV guidelines. May mga reporma na rin sa larangan ng energy sector upang makapasok na rin ang pribadong sektor.
Noong Hulyo ng 2012, ipinasa ng Energy Regulatory Commission ang feed-in-tariff rates upang makapasok ang renewable energy developers na maglagak ng kapital at mapadali ang pagkalat nito sa iba't ibang bahagi ng bansa.
1 2 3 4 5
