Mga kawal na Filipino, uuwi na mula sa Liberia

Special Feature

Lindol sa Bohol

BUKAS gugunitain ang malakas na lindol na yumanig sa Bohol at Cebu noong 2013. Naging matindi ang pinsala sapagkat nagiba at gumuho ang mga sinaunang simbahan na kilala bilang heritage sites.

Subalit sa likod ng mga pagyanig, unti-unting nakabawi ang mga mamamayan ayon kay Bishop Leonardo Medroso.

Sa isang panayam, sinabi ni Bishop Medroso na nakabawi na ang mga residente at nakaipon ng lakas mula sa trahedya. Bagsak ang industriya ng turismo ayon sa obispo.

Noong nakalipas na taon, matapos yumanig ang lupa sa Bohol at mga kalapit lalawigan tulad ng Cebu, napalapit ang mga mamamayan sa Diyos at nagsimulang magtayong muli ng kanilang mga tahanan, simbahan at bumalik na rin sa normal na buhay.

Unti-unti na nilang natanggap na may mga pagkakataong 'di inaasahan at trahedyang nagaganap.

Napagkaisahan din ng mga mamamayang magtayo ng kanilang mga simbahan bilang pamalit sa mga gumuhong simbahan. Nabuksan na ang isang alternate church sa Loboc, Bohol, dagdag pa ng obispo.

Inaasahan na rin nilang magtatagal ang tugon ng pamahalaan sapagkat maraming pagdaraang kamay ang mga palatuntunan at salaping ilalabas para sa mga biktima.

Sa likod nito, nagpapasalamat si Bishop Medroso sapagkat tuloy ang tulong ng kanilang mga benefactor. Sana raw ay huwag magsawang tumulong pa sapagkat magtatagal ng lima hanggang sampung taon ang pagtatayo ng mga simbahan.

Makababawi ang Bohol kung magkakaroon ng bagong investments sa larangan ng turismo sapagkat ito ang buhay ng mga Boholanon.

May lakas na 7.2 magnitude ang lindol na tumama sa Bohol noong ika-15 ng Oktubre 2013. May 344,300 katao ang nawalan ng tahanan at may 80% sa kanilang nanirahan sa mga barong-barong malapit sa kanilang mga nasirang tahanan.

Sa itinakdang action plan, nangailangan ng US$ 46.8 milyon upang matugunan ang pangangailangan ng mga biktima hanggang Abril ng 2014.