Paghahanda para sa pagdalaw ni Pope Francis, tuloy pa rin
PAGBUO NG MEDICAL TEAMS, GINAGAWA NA. Ito ang sinabi ni Health Undersecretary Ted Herbosa sa panayam ng CBCP Media Office. Layunin nilang makabuo ng may 25 medical teams at dalawang field hospitals sa pook na malapit sa Quirino Grandstand sa pagmimisa ni Pope Francis sa Enero. Umaasa si USec. Herbosa na mula lima hanggang anim na milyong mga Filipino ang dadalo sa okasyon. (Melo M. Acuna)
TULOY ang paghahanda ng pamahalaan ng Pilipinas sa napipintong pagdalaw ni Pope Francis sa Pilipinas sa susunod na buwan.
Ito ang sinabi ni Health Undersecretary Ted Herbosa sa panayam sa CBCP Media Office kanina. Ipinaliwanag ni Dr. Herbosa na hindi lamang isang apostolic visit ang magaganap sapagkat ito ay isa ring state visit sapagkat isang head of state si Pope Francis.
Pinaghahandaan nila ang mga okasyong dudumugin ng mga Filipino tulad ng Misa sa Tacloban City na inaasahang dadaluhan ng isa hanggang dalawang milyong mga mamamayan mula sa Kabisayaan at Mindanao. Tinataya rin ni Dr. Herbosa na magkakaroon ng mula lima hanggang anim na milyong tao sa Luneta.
Maglalagay sila ng mga medical team sa iba't ibang mga pook tulad ng University of Sto. Tomas para sa mga kabataan, Manila Cathedral para sa mga obispo at kaparian at maging sa Mall of Asia na dadaluhan ng mga pamilya.
Kahit umano sa Villamor Air Base ay magkakaroon ng medical teams. May pagtutulungan na ang mga manggagamot ng University of Sto. Tomas, Cardinal Santos Memorial Medical Center at ang mga manggagamot ng pamahalaan.
Umaasa silang makakabuo ng 25 medical teams na katatagpuan ng tatlo hanggang apat na manggagamot at kaukulang narses, mga tsuper at iba pang mga tauhan. Magtatayo rin sila ng dalawang field hospitals upang tumugon sa mga minor incidents.
Sa Tacloban City, samantalang binagyong muli ang kanilang pagamutan at mga tauhan, daragdagan ang mga manggagamot at iba pang personnel ng mga tauhan mula sa Cebu at Iloilo. Posible ring kumuha ng mga tauhan mula sa Bicol.
1 2 3 4 5
