Kontrobersya sa ginawa ng Smartmatic, lumalim pa
SINABON ni Election Commissioner Rowena Guanzon ang election technology provider na Smartmatic sa paggalaw ng script ng transparency servers ng walang pahintulot mula sa buong koponan ng Commission on Elections.
Ginawa ni Guanzon ang pahayag matapos ipakita ni Marlon Garcia ng Smartmatic kung pano nito inayos ang script upang ituwid anG "?" sa mga pangalan ng mga kandidato na mayroong "ñ".
Ayon kay Commissioner Guanzon, ang Smartmatic, sa kanyang pananaw ang sumira ng protocol at nararapat lamang na panagutin ng Commission on Elections at nararapat silang papanagutin sa mga mamamayan ng bansa. Ito ang kanyang pahayag sa mga tagapagbalita sa Philippine International Convention Center sa Pasay City kanina.
Marapat lamang sanang nagsabi sila sa Comelec en banc kung ano ang pinaka-problema, ang mga maaaring maganap at magbigay ng rekomendasyon kung paano maitutuwid ang pagkakamali. Hindi nila nararapat ginalaw ang programa ng hindi nababatid ng Comelec at hindi nabibigyan ng pahintulot, dagdag pa ni Commissioner Guanzon.
Subalit ipinarating din ni Guanzon ang pagtiyak ng Smartmatic na kahit nagkaroon ng pagbabago sa protocol, hindi mababago ang kinalabasan ng unofficial vote count.
Tinitiyak din ng Commission on Elections sa mga mamamayan na ipinasisiyasat nila ang insidente. Hindi dapat pinakialaman ng Smartmatic ang mga makinang ito sapagkat ang may-ari nito'y ang Pamahalaan ng Plipinas.
Idinagdag pa ni Commissioner Guanzon na ang automated system ay pag-aari ng Comelec at sil;a'y mananagot sa mga mamamayan at sa Kongreso kaya't 'di nararapat na pinakialaman ng walang pahintulot.
Sa katanungan kung pinag-aralan na ng Comelec na tapusin ang kontrata sa Smartmatic, sinabi ni Commissioner Guanzon na aalamin nila kung ang pakikialam na ito ay sapat na upang huwag nang isama sa mga susunod na political exercises.
Susuportahan ni Commissioner Guanzon ang pagkakansela sa kontrata ng Smartmatic kung pag-uusapan ang bagay na ito. Pinuna ng opisyal ng Comelec ang 'di paghingi ng paumanhin ng Smartmatic sa kanilang ginawa.
1 2 3 4 5
