Simbahang Katolika, nababahala sa mga pagpaslang
MGA OBISPO, NABAHALA SA MGA PAGPASLANG. Nababahala si Arsobispo Socrates B. Villegas, pangulo ng Catholic Bishops Conference of the Philippines sa mga pagpaslang ng mga sinasabing drug pusher mula noong nakalipas na halalan. Magiging makatwiran ang pagbaril at pagpatay sa sinuman sa oras ng pagtatanggol sa sarili o sa kapwa, dagdag pa ni Arsobispo Villegas. (File Photo/Roi Lagarde)
SA sunod-sunod na pagpaslang na katulad ng mga ginagawa ng mga vigilante, ipinarating ng mga obispo ang kanilang pagkabahala sa mga nagaganap sa buong bansa.
Ikinabahala nila ang pagkakaroon ng mga pabuya sa bawat napapaslang. Samantalang pinupuri ng mga obispo ang pinag-ibayong kampanya laban sa kriminalidad, ipinarating nila ang pagkabahala sa pagtaas ng bilang ng mga nasasawi matapos makipagbarilan umano sa mga autoridad.
May 34 katao na ang napapaslang. Mga drug pusher umano ang mga napaslang matapos ang pinag-ibayong kampanya mula noong matapos ang halalan.
Ipinaliwanag ni Arsobispo Socrates B. Villegas, pangulo ng CBCP na mapahihintulutan lamang ang pagbaril upang pumatay bilang pagtatanggol sa sarili o pagtatanggol sa ibang mga mamamayan.
Hindi umano angkop ang pagbibigay ng pabuya sapagkat malaki ang posibilidad na maabuso ang mga pagpaslang sa sinasabing mga tulak ng droga. Hindi rin angkop ang pagtanggap ng pabuya sa pagpaslang ng kapwa tao.
Obligasyon ng mga Christiano na ibunyag ang pagsasakamay ng batas sapagkat ang mga pagpaslang ay taliwas sa batas.
1 2 3 4
