Bilang ng mga napapaslang na umano'y sangkot sa droga, tumaas pa
UMABOT na sa 239 kataong sangkot sa ilegal na bentahan ng bawal na gamot ang napapaslang sa nakalipas na police operations.
Ayon sa pahayag ng Philippine National Police, bumaba na rin ang bilang ng krimen sa nakalipas na anim na buwan ng 2016.
Ito umano'y ayon sa pahayag ni PNP Chief Director General Ronald M. Dela Rosa bilang epekto ng agresibong kampanya laban sa droga.
Umaasa si PNP Director for Operations Chief Supt. Camilo Pancratius Cascolan na patuloy na bababa ang krimen sa pagpapatuloy ng kampanya ng pulisya laban sa mga sinasabing drug-related criminal activities sa mga susunod na buwan.
Mula sa 52,950 naitala noong Enero ng 2016, ang Total Crime Volume ay bumaba ng 13% sa una at pangalawang kwarter ng taon at umabot na lamang sa 46,060 crime incidents noong Hunyo ng 2016.
Sa pagsusuri ng pulisya, sa pagpapatupad ng Project Double Barrel, bababa ang krimen sapagkat may koneksyon ang paggamit ng droga sa iba pang uri ng krimen laban sa mga mamamayan at ari-arian.
Sa pagpapatupad ng programa noong unang araw ng Hulyo,2016. Nakapagtala ng 3,213 taong nadakip sa hiwa-hiwalay na police operations sa buong bansa.
Dumalaw na rin ang pulis sa ilalim ng kanilang "Tokhang" project o pagdalaw sa mga tahanan ng pinaghihinalaang mga drug personalities, at may 120,038 na ang sumuko na kinabibilangan ng may 112,902 gumagamit ng bawal na gamot at 7,107 na drug pushers.
1 2 3 4
