Petisyon laban sa dagdag na isang taon ng Martial Law, ibinasura
IBINASURA ng Korte Suprema ang mga petisyong humiling na pawalang-saysay ang deklarasyong dagdag na isang taon ng Martial Law sa Mindanao. Ayon sa Korte Suprema, may sapat na dahilan sina Pangulong Rodrigo Duterte at ang Kongreso sa pagdedeklara ng mas mahabang panahon ng Martial Law.
Sinabi ni Atty. Theodore Te, tagapagsalita ng Korte Suprema, umabot sa 10 laban sa lima ang botohan na nagsasabing ayon sa Saligang Batas ang Martial Law extension.
Kailangan ng "public safety" ng extension ayon sa datos ng Armed Forces of the Philippines.
Si Associate Justice Noel Tijam ang may akda ng desisyon ng mayorya na kinatigan nina Associate Justices Presbitero Velasco, Jr., Teresita Leonardo de Castro, Diosdado Peralta, Lucas Bersamin, Mariano del Castillo, Estela Perlas Bernabe, Samuel Martirez, Angres Reyes, Jr. at Alexander Gesmundo.
Ang hindi kumatig sa martial law extension ay sina Chief Justice Maria Lourdes Sereno, Senior Associate Justice Antonio Carpio, Associate Justices Marvic Leonen, Francis Jardeleza at Alfredo Benjamin Caguioa.
Apat ang petisyong nakarating sa Korte Suprema na nagtatanong kung sang-ayon ba ang deklarasyon ng isang taong extension sa Saligang Batas. Ang isa sa mga nagpetisyon ay si Albay Congressman Edcel C. Lagman. Sumunod naman ang National Union of People's Lawyers at ang Makabayan Bloc ng mga mambabatas sa Mababang Kapulungan.
Nagpetisyon din si dating Commission on Human Rights chairman Loretta Ann Rosales, isang grupong kinabibilangan ni Congresswoman Kaka Bag-ao at dating Comelec chair Christian Monsod.
Ayon sa desisyon, ang ginawa ng Kongreso ay sapat na at 'di na kailangan pa ng judicial review. May sapat na umanong kalakaran at pamamaraan ang Kongreso kaya't 'di na kailangan pang magkaroon ng pagbabalik-aral ang Hudikatura.
Tahimik din umano ang Saligang Batas kung hanggang ilang ulit magkakaroon ng extension ang Martial Law tulad rin ng suspension ng writ of habeas corpus.
1 2 3
