NAY PYI TAW, Myanmar—Idinaos kahapon ang Ika-17 Pulong ng mga Lider ng Tsina at ASEAN. Magkasamang nangulo sa pulong sina Premyer Li Keqiang ng Tsina at Pangulong Thein Sein ng Myanmar, bansang tagapangulo ng ASEAN.
Sinabi ni Premyer Li na makaraang maranasan ang Tsina at ASEAN sa pagtutulungan sa Golden Decade mula 2003 hanggang 2013, pumapasok na at lalalim pa ang kooperasyon ng dalawang panig sa susunod na Diamond Decade. Upang mapahigpit ang pagtutulungang Sino-ASEAN, iniharap ni Premyer Li ang anim na sumusunod na mungkahi. Una, magkasamang balangkasin nila ang estratehiya ng pag-unlad ng relasyong Sino-ASEAN at simulang itakda, sa lalong madaling panahon ang ikatlong plan of action (2016-2020) ng Magkasamang Deklarasyon sa Estratehikong Partnership na Pangkooperasyon ng Tsina at ASEAN na Nakatuon sa Kapayapaan at Kasaganaan. Ikalawa, magkasamang i-upgrade ang Malayang Sonang Pangkalakalan ng Tsina at ASEAN (CAFTA). Magsisikap ang dalawang panig para makumpleto ang talastasan hinggil sa pag-a-upgrade ng CAFTA sa 2015. Ikatlo, pabilisin ang konektibidad sa imprastruktura ng Tsina at ASEAN. Ikaapat, makalikha ng bagong pagtutulungang pandagat, itakda ang taong 2015 bilang Taon ng Pagtutulungang Pandagat ng Tsina at ASEAN, pahigpitin ang diyalogo at kooperasyon sa pagitan ng mga organong pandagat sa law enforcement at itatag ang Sentro ng Pagtutulungang Pandagat. Kasabay nito, magkasamang gamitin ang China-ASEAN Maritime Cooperation Fund. Ikalima, magkasamang itaguyod ang Di-pormal na Pulong ng mga Ministrong Pandepensa ng Tsina at ASEAN at talakayin ang posibilidad ng pagtatatag ng hotline hinggil sa mga isyung pandepensa. Ikaanim, galugarin ang bagong larangan ng pagtutulungan sa kultura, edukasyon, pagpapahupa ng kahirapan, pananaliksik at pagdedebelop (R&D), panganalaga sa kapaligiran, at pagsasanay sa mga tauhan ng kalusugang pampubliko. Kaugnay ng pagpapahupa ng karalitaan, sa taong 2015, magbibigay ang Tsina ng tatlong (3) bilyong Yuan o 500 milyong dolyares na walang bayad na tulong na pinansyal sa least developed countries ng ASEAN.
Salin: Jade
