INATASAN ng Korte Suprema sa pamamagitan ng dalawang temporary restraining orders ang Commission on Elections na nagkakansela sa certificate of candidacy ni Senador Grace Poe.
Saklaw ng dalawang TROs ang dalawang hiwalay na desisyon ng Comelec en banc na kumilala sa naunang mga desisyon ng First at Second divisions.
Kinansela ng First Division ang Certificate of Candidacy ni Poe sa mga tanong sa pagkatao at paninirahan sa bansa na inihain ni dating Senador Francisco Tatad, Dean Amado Valdez at Antonio Contreras.
Kinansela naman ng Second Division ng Commission on Elections ang Certificate of Candidacy ni Senador Poe sa petisyon ni Atty. Estrella Elamparo na nagsasabing hindi natugunan ng mambabatas ang constitutional requirement ng 10-year residency ng mga kandidato sa pagkapangulo.
Ayon sa TRO, inuutusan ng Korte Suprema ang Commission on Elections na huwag ipatupad ang mga resolusyon ng komisyunado hanggang walang anumang kakaibang kautusang magmumula sa hukuman.
Ayon kay Atty. Theodore Te, tagapagsalita ng Korte Suprema, nagmula ang mga kautusan kay Chief Justice Maria Lourdes Sereno ayon sa rekomendasyon ng Member-in-Charge ayon sa mga regulasyon ng korte. Samantalang, inatasan ng Korte Suprema ang Comelec ng sampung araw na maglahad ng kanilang panig sa dalawang petisyon ni Senador Poe.
Hindi pinagsama-sama ang tatlong usapin kaya't magkakaroon ng oral argument sa darating na ika-19 ng Enero.
Maliban sa dalawang petisyong nagtatanong sa desisyon ng Comelec na angkakansela sa Certificate of Candidacy ni Grace Poe, isasalang din sa oral argument sa ika-19 ng Enero ang petisyon ni Rizalito David na humiling na baliktarin ang desisyon ng Senate Electoral Tribunal na nagpawalang saysay sa disqualitication case laban sa mambabatas.
