HINDI magtataka si Senador Grace Poe kung si Interior Secretary Manuel Araneta Roxas II ang i-inderso ni Pangulong Benigno Simeon C. Aquino III sapagkat iisa naman ang partidong kanilang pinagmulan.
Sa kanyang pakikipag-usap sa mga mamamahayag, sinabi ni Senador Poe na palagi namang sinasabi ni Pangulong Aquino sa kanya ay naiintindihan niya ang lahat at magagawa na nais nilang gawin lalo't makabubuti sa bansa. Nagpapasalamat din siya sapagkat kinilala siyang presidential candidate ni G. Aquino.
Ipinaliwanag pa ng senador na ilang ulit silang nag-usap ni Pangulong Aquino hinggil sa nalalapit na halalan. Wala naman umanong inialok ang pangulo sa kanya na maging pangalawang pangulo ni Secretary Roxas.
Wala pang deklarasyon sina Senador Poe at Secretary Roxas ng kanilang balak sa darating na halalan kahit pa isinusulong ng Partido Liberal si G. Roxas na kumandidato na sa panguluhan kahit pa nangunguna sa mga nakalipas na survey si Senador Poe.
Hindi naman umano siya umaasang siya ang i-indorso ni Pangulong Aquino sapagkat mahirap mabigo.
