Bilang dalawang pinakamalaking ekonomiya sa daigdig, palagiang nakakatawag ng pansin ang pag-unlad ng bilateral na relasyong pangkabuhayan at pangkalakalan ng Tsina at Amerika. Makaraang maupo sa puwesto ang bagong halal na American President na si Donald Trump, kung maitutuloy o hindi ang mainam na tunguhin ng pag-unlad ng nasabing relasyon, ay nakakatawag din ng malaking pansin ng buong daigdig.
Nang kapanayamin ng mamamahayag kamakailan, sinabi ni Xu Chen, Puno ng China General Chamber of Commerce – USA (CGCC), na noong taong 1979 na naitatag ang relasyong diplomatiko ng Tsina at Amerika, 2.5 biylong dolyares lamang ang halaga ng bilateral na kalakalan ng dalawang bansa. Noong isang taon, umakyat na sa halos 52 bilyong dolyares ang halagang ito, at ito ay mas malaki ng mga 207 ulit. Aniya, kung maipagpapatuloy ang tunguhin ng positibong pag-unlad ng relasyong pangkalakalan ng Tsina at Amerika, magiging silang pinakamalaking trade partner ng isa't-isa sa malapit na hinaharap.
Tinukoy ni Xu na ang pagluluwas ng Amerika sa Tsina sa mga larangan, ay nagsisilbing mahalagang puwersang tagapagpasulong sa pag-unlad ng kabuhayan nito. Bukod dito, ang mabilis na paglaki ng pamumuhunan ng Tsina sa Amerika ay nakakalikha ng maraming pagkakataon ng hanap-buhay para sa Amerika.
Ipinagdiinan din niya na ang malusog at matatag na pag-unlad ng relasyong pangkabuhayan at pangkalakalan ng Tsina at Amerika ay hindi lamang angkop sa aktuwal na kapakanan ng mga mamamayan ng dalawang bansa, kundi malaki ang katuturan nito para sa pag-ahon ng kabuhayang pandaigdig at mapayapang pag-unlad ng buong mundo.
Salin: Li Feng
