Habing Pinoy, itinatanghal sa Peking University

Kasalukuyang itinatanghal ang "Honed in Tradition: Philippine Weaves" sa School of Foreign Languages ng Peking University.

Sa kanyang mensaheng panalubong sa pagbubukas ng eksibit ngayong araw, Oktubre 19, 2017, sinabi ni Jose Santiago Sta. Romana, Sugo ng Pilipinas sa Tsina, na itinatampok ng eksibisyon ang likas na pagkamalikhain ng mga Pilipino at kung paano nila ipinamamalas ang mga kaugalian sa pamamagitan ng kanilang pang-araw araw na kasuotan.

Si Embahador Sta. Romana

Pahayag ni Sta. Romana, mayaman at natatangi ang kultura ng paghahabi sa Pilipinas mula sa 110 cultural communities ng bansa. Maaaring hatiin ito sa tatlong grupo, mga Kristiyano, Muslim, at Katutubo. Bawat pangkat ay may kani-kanilang istilo o debuho.

Mas malalim na kaalaman sa Kulturang Pinoy

Ibinahagi rin ng sugong Pilipino sa eksklusibong panayam ng CRI Serbisyo Filipino, na inaasahan niyang maaaring matutunan ng mga estudyante at guro sa pamantasan ang kultura at tradisyon ng Pilipinas.

Aniya, "Kapag nakita nila kunwari ang Terno, na sinusuot ng mga kababaihan sa Pilipinas, Barong Tagalog na suot ng mga lalaki (at malamang) galing ito sa abaca (at) pinya, sa tingin ko ay maiintindihan nila, lalo (pa't ngayon itinitinda) nila ang pinya sa Tsina, makikita nila na hindi lang ito pagkain kundi makakagawa ka dito ng tela na sinusuot ng mga kababaihan at kalalakihan. At yung saging kung saan makukuha ang abaca."

Dagdag niya, "Hangad din ng eksibit na magkaroon sila ng pagnanais na bumisita sa Pilipinas at makita mismo ang ating kultura doon at lalo nilang maintindihan itong tradisyon na ito."

Sa kanya namang talumpati, sinabi ni Prof. Li Shujing, Kalihim ng Komite ng Partido ng School of Foreign Languages ng Peking University (PKU) na mahaba ang kasaysayan ng pagpapalitan at pagtutulungan ng PKU at ng Pasuguan ng Pilipinas. Sa pamamagitan ng Philippine Studies Program, aniya, nagkakaroon ang mga Tsino ng mas mabuti at malalim na kaalaman hinggil sa Pilipinas. At inaasahan niya ang pagkakaroon ng mas maraming aktibidad na pang-kultura sa pagitan ng dalawang panig sa hinaharap.

Si Prof. Li Shujing

Reaksyon ng mga Mag-aaral sa Eksibit

Dumalo sa pagbubukas ng eksibisyon ang mga mag-aaral na nasa unang taon ng Philippine Studies Program ng PKU. Sinabi ni Guo Chencen, "Napakaganda ng eksibit, nalaman ko ang kasaysayan ng paghahabi sa Pilipinas. Nakita ko rin ang maraming uri ng tela at sa tingin ko pinakamaganda ang Habing Ilocos dahil ito ay madaling isuot."

Si Guo Chencen

Samantala, namangha naman si Yu Yi sa nakitang barong na suot ng kanyang guro at kakaiba sa paningin ang tela na mula sa hibla ng pinya. Kung mabibigyan ng pagkakataon, nais niyang subukang isuot ang damit.

Si Yu Yi

Aktibidad na Kultural sa Hinaharap

Sa panayam ibinahagi rin ni Embahador Sta. Romana na plano ng pasuguan sa susunod na taon na idaos ang pagtatanghal ang Ballet Philippines sa Tsina at pagsasagawa ng eksibit na magpapakita ng iba pang aspekto ng kultura ng Pilipinas.

Nabanggit din ni Amb. Sta. Romana ang naging pagsali ng Pilipinas sa katatapos lang na Beijing International Book Fair, at mababasa ngayon ng publiko sa pasuguan ang mga award-winning books mula sa Pilipinas na itinanghal sa book fair. Hangad niyang magkaroon ang aklatan ng PKU ng mga nasabing libro sa malapit na hinaharap.

Dumalo rin sa seremonya ng pagbubukas sina Consul Kay Kalaw-Ado at Joan Pichay ng Pasuguan ng Pilipinas, Prof. Wu Jiewei, Pangalawang Dekano ng School of Foreign Languages ng PKU, Dr. Shi Yang, Direktor ng PKU Philippine Studies Program, Dr. Huang Yi, Guro ng PKU Philippine Studies Program at Dr. Huo Ran, Guro ng Filipino Section, School of Asian and African Studies ng Beijing Foreign Studies University.

grupo photo ng mga kalahok sa seremonya ng pagbubukas ng eksibit

Ulat: Mac Ramos
Larawan: Philippine Embassy, Lele
Edit: Jade