Moscow, Rusya—Huwebes, ika-5 ng Abril, 2018, magkahiwalay na kinatagpo nina Pangulong Vladimir Putin at Ministrong Panlabas Sergei Lavrov ng Rusya si Wang Yi, Espesyal na Sugo ni Pangulong Xi Jinping ng Tsina at Ministrong Panlabas ng bansa.
Sinabi ni Wang Yi na ang Tsina at Rusya ay komprehensibo, estratehiko at kooperatibong partner ng isa't isa, at nasa pinakamataas na antas ang kanilang pagtitiwalaang pulitikal. Aniya, nakahanda ang panig Tsino, kasama ng panig Ruso, na pabutihin ang paghahanda para sa isang serye ng pagpapalagayan ng mga lider ng dalawang bansa sa kasalukuyang taon, ipatupad ang mga komong palagay na narating ng dalawang lider, aktibong pasulungin ang kooperasyon sa malalaking proyekto, at magkasamang pangalagaan ang pandaigdigang sistema ng malayang kalakalan.
Si Pangulong Vladimir Putin (kaliwa) ng Rusya at si Ministrong Panlabas Wang Yi (kanan) ng Tsina
Ipinaabot naman ni Putin ang pagbati sa muling paghalal ni Xi bilang pangulo ng bansa. Aniya, napakaganda ng relasyong Sino-Ruso. Buong pananabik na inaasahan niya ang muling pagdalaw sa Tsina sa Hunyo ng taong ito, at patuloy na pagpapanatili ng mahigpit na pakikipag-ugnayan kay Pangulong Xi, sa pamamagitan ng iba't ibang bilateral at multilateral na okasyon. Umaasa aniya siyang matatamo ng relasyong Sino-Ruso ang mas malaking progreso, dahil makakabuti ito sa dalawang bansa man, o sa buong mundo.
Mga Ministrong Panlabas ng Tsina at Rusya na sina Wang Yi (kaliwa) at Sergei Lavrov (kanan)
Ipinahayag naman ni Lavrov na ang pagpapalakas ng komprehensibo, estratehiko at kooperatibong partnership nila ng Tsina ay pokus ng patakarang diplomatiko ng Rusya. Nakahanda aniya ang panig Ruso, kasama ng panig Tsino, na aktibong pasulungin ang pagpapalitan at pragmatikong kooperasyon sa iba't ibang larangan, at patuloy na palakasin ang estratehikong pag-uugnayan at pagtutulungan, sa loob ng mga multilateral na mekanismong gaya ng United Nations, G20, Shanghai Cooperation Organization, at iba pa.
Salin: Vera
