Malapit nang idaos ang dalawang taunang sesyon ng Pambansang Kongresong Bayan ng Tsina (NPC) at Pulitikal na Konsultatibong Kapulungan ng mga Mamamayang Tsino (CPPCC).
Sa ilalim ng epekto ng COVID-19 sa ibayong dagat, presyur sa kalakalang pandaigdig, ligalig sa pamilihang pinansyal at iba pang elemento, pinag-uukulan ng lubos na pansin ng komunidad ng daigdig kung paano pigilin at kontrolin ang epidemiya kasabay ng pagsusulong ng pag-unlad ng kabuhaya't lipunan.
Malinaw na batid ng Tsina na "walang katulad sa kasaysayan ang hamong kinakaharap ng pag-unlad ng kabuhayan," at "kailangang gumawa ng paghahanda para sa pagharap sa pagbabago ng kapaligirang panlabas sa mahabahang panahon."
Tinatayang sa gaganaping dalawang sesyon, ihaharap ng mga deputado at kagawad ang kani-kanilang kuru-kuro at mungkahi ukol sa pagpapasulong ng kabuhayan.
Kaugnay nito, ipinalalagay ni Pierre Picquart, Propesor ng University of Paris VIII, na ang pagdaraos ng nasabing dalawang sesyon ay palatandaan ng pagbangon ng kabuhayang Tsino.
Aniya, dapat pag-ukulan ng pansin ng daigdig ang dalawang sesyon at kilos ng kabuhayang Tsino sa kasalukuyang taon.
Sinabi naman ni Jie Michael Guo, Propesor ng Durham University Business School, na ang mga desisyong gagawin sa nasabing dalawang sesyon ay magpapakita ng direksyon ng pag-unlad ng kabuhayang Tsino sa hinaharap, at makakaapekto sa kayarian ng kabuhayang pandaigdig.
Ito aniya ang magiging susi sa bilis ng pagbangon ng kabuhayang pandaigdig, pagkaraan ng epekto ng pandemiya.
Salin: Vera
