Pito ang nasawi, maraming hirapan sa patuloy na pag-ulan

PANG. PANGULONG BINAY, NAGHATID NG RELIEF GOODS.  Pinamunuan ni Pangalawang Pangulong Jejomar C. Binay (kaliwa) ang pamamahagi ng relief goods sa Cavite.  Kasama niya ang kinatawan ng Lungsod ng Makati sa pagbibigay ng 1,000 bags ng relief goods sa mga taga-Rosario at General Trias, Cavite. (Contributed Photo)

SINASABING magpapatuloy ang pag-ulan hanggang sa Huwebes subalit sa mga oras na ito ay matindi na ang pagbaha sa Metro Manila at mga kalapit-pook. Nanatiling sarado ang mga tanggapan ng pamahalaan, mga paaralan at maraming hindi makalabas ng kanilang mga tahanan dahilan sa matinding ulan at baha.

Pito katao na ang nabalitang nasawi sa pagpapalit-anyo ng mga lansangang naging mga ilog.

Kahit ang Philippine Stock Exchange ay sarado rin. Ayon sa National Disaster Risk Reduction and Management Council, ang tanggapan ng pamahalaang tumutugon sa mga trahedya tulad ng bagyo, may 11 katao ang nasugatan at apat ang nawawala sa ikalawang sunod na araw ng pag-ulan at pagbaha dala ng panahong habagat na napalala ng bagyong si "Maring," international name Trami.

Ayon kay Ninoy Aquino International Airport General manager Jose Angel Honrado, kanselado ang paglalakbay ng Philippine Air Lines at Sea Air sa Ninoy Aquino Inernational Airport dahilan sa sama ng panahon.

May mga pook na hanggang baywang at hanggang leeg ang baha.

Sinabi ni Major Rey Balido, tagapagsalita ng National Disaster Risk Reduction Management Council na pawang mula sa Gitnang Luzon ang mga nasawi na pawang nangalunog. May 11 ang nasugatan, apat ang nabalitang nawawala. Apektado ang mga rehiyon ng Ilocos, Cordillera, Gitnang Luzon, Calabarzon, Mimaropa at National Capital Region.