Arsobispo Tria-Tirona: Maunlad ang bansa kung may edukasyon, kalusugan at katarungan
MAUNLAD ANG BANSA KUNG MAY EDUKASYON, KALUSUGAN AT KATARUNGAN. Ito ang pahayag ni Arsobispo Rolando Tria-Tirona, OCD, Arsobispo ng Caceres at Chairman ng CBCP Episcopal Commission on Social Action, Justice and Peace sa panayam ng CBCP Online Radio kanina sa Lungsod ng Naga, Camarines Sur. (Melo Acuna)
NANINIWALA si Arsobispo Rolando Tria-Tirona, OCD, Arsobispo ng Caceres sa Camarines Sur at Chairman ng CBCP-Episcopal Commission on Social Action, Justice and Peace na maituturing na maunlad ang isang bansa kung mayroong edukasyon para sa lahat, may maayos na palatuntunan para sa kalusugan at nadarama ng taongbayan ang katarungan.
Sa isang panayam sa kanyang tahanan sa Lungsod ng Naga, sinabi ni Arsobispo Tirona na tulad ng industriya ng pagmimina, mangilan-ngilan lamang ang nakikinabang sa isang mapaminsalang industriya.
Nagbibirong sinabi ni Arsobispo Tirona na kung talagang kaloob ng Diyos ang pagmimina, hindi n asana pinahirapan ang tao upang makuha ang likas na yamang ito.
Mahirap umanong matanggap ang sinasabing economic benefits na matatamo sa pagmimina sapagkat napipinsala ang kapaligiran at ang kalikasan. Nararapat lamang suriin ng pamahalaan ang mga benepisyong matatamo at mawawala kung sakaling sumigla ang industriya ng pagmimina.
Hindi umano sapat ang dole-outs at pagtatayo ng ilang mga paaralan upang mapunuan ang pinsalang idudulot nito sa komunidad at sa kalikasan.
Samantala, sinabi ni Arsobispo Tirona na hiniling niya kay Bishop Broderick Pabillo na pangasiwaan ang tanggapan hanggang sa Abril ng 2014 upang huwag maantala ang pakikipag-ugnayan sa mga banyagang tanggapang nagpapadala ng tulong sa mga napinsala ng nakalipas na mga trahedya sa Bohol dulot ng malakas na lindol at sa ilang rehiyon ng bansa dulot naman ng napakalakas na bagyong Yolanda noong nakalipas na buwan.
1 2 3 4 5 6
