Pagkakalason dahil sa milk tea, pambihira
SA naunang sample ng milk tea na nainom ng tatlo katao noong nakalipas na linggo ang natamo ng Kagawaran ng Kalusugan sa pakikipagtulungan sa Food and Drug Administration at mga dalubhasa sa UP-Philippine General Hospital. Nakuha na rin nila ang pelikula mula sa tindahan upang masuri ang mga kapuna-punang naganap at dahilan ng pagkasawi at pagkakasakit ng mga biktima.
Sa unang mga pagsisiyasat at pagsusuri, walang anumang nakitang nakalalasong sustansya. Sa pangyayaring ito, magkakaroon ng mas malawak na mga pagsubok tulad ng pagsusuri sa dugo, laman at nilalaman ng sikmura ng mga biktima samantalang ginagawa ang autopsy.
Ayon kay Acting Health Secretary Janette Garin, isang isolated case ang naganap. Ito umano ang ikatlong ulit ng bumili ang magkasintahan sa tindahan. Nakiusap si Dr. Garin sa madla na huwag nang palakihin ang isyu sapagkat maraming nabubuhay sa pagbebenta ng milk tea at iba pang pamatid-uhaw.
Nanawagan din siya sa madla na bantayan ang sintomas ng pagkakalason tulad ng pagsusuka, pagdudumi, panghihina ng kalamnan at kawalan ng malay. Kailangang madala kaagad sa pinakamalapit na pagamutan sapagkat mangangailangan ito ng agarang paggamot. Maaari silang tumawag sa 5548400 local 2311 at 5241079 at 0922 8961541.
Dalawa katao ang nasawi samantalang isa ang nasa malubhang kalagayan matapos makainom ng milk tea mula sa isang pondahan sa Maynila. Tuloy pa ang pagsisiyasat.
1 2 3 4 5
