Isinakdal kahapon ng prokuratura ng Ehipto ang pinakamataas na lider at dalawang pangalawang lider ng Muslim Brotherhood na pinaghihinalaang nanulsol ng karahasan. Hiniling din nitong litisin ang mga naturan sa hukumang kriminal.
Sinabi ng prokuratura, na pinaghihinalaang sinulsulan ng naturang mga lider ng Muslim Brotherhood ang kanilang mga tagasuporta na gumawa ng karahasan. Ito ay nagresulta sa pagkamatay ng mga demonstrador noong Hunyo ng taong ito, sa harapan ng punong himpilan ng kanilang organisasyon.
Samantala, hiniling naman kahapon ng transisyonal na pamahalaan ng Ehipto sa Ministri ng Suliraning Panloob, na magsagawa ng hakbangin para bigyang-wakas ang demonstrasyon ng mga tagasuporta ni dating Pangulong Mohamed Morsi. Anito, ang mga demonstrasyon ay banta sa pambansang seguridad, at nagdudulot din ng takot sa mga mamamayan.
Salin: Liu Kai