Pagkaraan ng pagkakatibay kaninang madaling araw sa Mataas na Kapulungan ng Parliamento ng Hapon, naisabatas ang ilang security bill, na magpapaluwag ng mga limitasyon sa papel ng sandatahang lakas ng bansang ito.
Dahil nagkakaroon ang naghaharing koalisyon ng Hapon ng nakararaming luklukan sa Mataas na Kapulungan, pinasulong ng pamahalaan ni Punong Ministro Shinzo Abe ang pagpapatupad ng naturang lehislasyon. Batay dito, sa kauna-unahang pagkakataon nitong 70 taong nakalipas, puwedeng ipadala ng Hapon ang mga tropa sa labas ng bansa, para lumahok sa armadong sagupaan. Ito ay palatandaan ng pagtanggal ng Hapon sa "purely defensive defense posture" na isinagawa nito pagkatapos ng World War II.
Ang aksyong ito ng pamahalaan ng Hapon ay tinututulan ng iba't ibang sirkulo ng bansa.
Ipinahayag ng mga partidong oposisyon na ang aksyong ito ay nakakapinsala sa pasipismo at demokrasya ng Hapon.
Sinabi naman ng mga media ng Hapon na ang naturang lehislasyon ay labag sa Konstitusyon, at lubos na mali ang pamahalaan ni Abe na nagpasulong sa pagpapatibay ng mga pinagtatalunang panukalang-batas, nang walang sapat na pagsusuri.
Idinaos naman ng maraming mamamayang Hapones ang demonstrasyon sa iba't ibang lugar bilang protesta sa naturang lehislasyon. Tinatawag nila ang mga pinagtibay na panukalang-batas na "war bills."
Samantala, bilang tugon sa naturang pangyayari, sinabi ngayong araw ni Tagapagsalita Hong Lei ng Ministring Panlabas ng Tsina, na dapat pulutin ng Hapon ang aral sa kasaysayan, pakinggan ang makatarungang pananawagan mula sa loob ng bansa at komunidad ng daigdig, at pahalagahan ang pagkabahala ng mga bansang Asyano. Hinimok niya ang Hapon na maging maingat sa larangan ng militar at seguridad, at igiit ang mapayapang landas.
Ipinahayag naman ng mga estadista at eksperto ng mga bansang gaya ng Timog Korea, Singapore, Kambodya, Indonesya, Australya, at iba pa, ang naturang aksyon ng pamahalaan ng Hapon.
Salin: Liu Kai
