ACC, espesyal na tulay para sa relasyong Sino-ASEAN

Idinaos kamakailan sa Beijing ng ASEAN-China Center (ACC) ang resepsyon bilang pagdiriwang sa ika-5 anibersaryo ng pagkakatatag nito. Dumalo rito ang halos 400 panauhin na kinabibilangan nina Sun Guoxiang, espesyal na sugo ng Ministring Panlabas ng Tsina sa mga Suliraning Asyano, Vandy Bouthasavong, Embahador ng Laos sa Tsina, mga diplomata at kinatawan ng Brunei, Cambodia, Indonesia, Singapore, Pilipinas, Thailand, at Biyetnam sa Tsina, at mga kinatawan mula sa sirkulong komersyal at industriyal, akademiko, bahay-kalakal, at media.

Si Sun Guoxiang, espesyal na sugo ng Ministring Panlabas ng Tsina sa mga Suliraning Asyano

Binasa ni Sun ang mensaheng pambati na ipinadala ni Ministrong Panlabas Wang Yi ng Tsina. Sa kanyang mensahe, lubos na pinapurihan ni Wang ang natamong kapansin-pansing bunga ng ACC nitong limang (5) taong nakalipas. Aniya, ang ACC ay unti-unting nagsisilbi bilang espesyal na tulay at mahalagang plataporma ng mapagkaibigang pagpapalitan at pragmatikong kooperasyon sa pagitan ng Tsina at ASEAN. Positibong ambag ang nagawa nito para sa pag-unlad ng relasyong Sino-ASEAN, dagdag niya.

Si Vandy Bouthasavong, Embahador ng Laos sa Tsina

Sa kanya namang mensahe, sinabi ni Vandy na sa pamumuno ng Pangkalahatang Kalihim ng ACC na si Yang Xiuping, gumaganap ito ng mahalagang papel para sa pagpapasulong ng relasyong Sino-ASEAN. Aniya, bilang tulay at plataporma, malakas na isinusulong ng ACC ang pag-uugnayan at pagtutulungan ng Tsina at ASEAN sa iba't-ibang larangan. Bukod dito, napalalim din nito ang pragmatikong kooperasyon ng dalawang panig sa mga larangang tulad ng kalakalan, pamumuhunan, edukasyon, kultura, turismo, at media, dagdag pa niya.

Si Yang Xiuping, Pangkalahatang Kalihim ng ACC

Ipinahayag naman ni Yang ang pasasalamat sa ibinibigay na pansin at pagkatig ng mga pamahalaan ng Tsina at mga bansang ASEAN, at iba't-ibang sirkulo ng lipunan, sa ACC sa mahabang panahon. Aniya, patuloy na magsisikap ang ACC para makapagbigay ng mas malaking ambag sa kooperasyong pangkaibigan ng Tsina at ASEAN.

Salin: Li Feng