Ang taong 2018 ay ika-40 anibersaryo ng pagsasagawa ng Tsina ng reporma't pagbubukas, at dumarami ang tinig ng mga bansang kanluranin hinggil sa "Saan patungo ang Tsina", "Partner o kalaban ang Tsina," at "Pagkakataon o hamon ang Tsina." Sa ilalim ng ganitong kalagayan, makahulugan ang katuturan ng ika-3 Understading China Conference na binuksan sa Beijing nitong Linggo, Disyembre 16, 2018.
Layon ng Understanding China Conference na pahigpitin ang pag-uunawaan ng daigdig sa Tsina, at pasulungin ang pagpapalitan at pagtutulungan sa loob at labas ng Tsina. Halos 600 personahe, na kinabibilangan ng halos 40 kilalang estadista, estratehista, at mangangalakal sa daigdig ang kalahok sa kasalukuyang konperensya.
Ang mga pagtatalong may kinalaman sa Tsina ng komunidad ng daigdig, lalung lalo na, mga bansang kanluranin, ay maaaring lagumin sa tatlong tanong. Ibig sabihin, anong uring bansa ang Tsina? Saan nanggaling ang Tsina? Pasaan ang Tsina? Ang nasabing tatlong tanong ay sinagot ng mga panauhing Tsino't dayuhan na kalahok sa komperensya.
Kaugnay ng unang tanong, sa kaniyang talumpati sa seremonya ng pagbubukas, tinukoy ni Yang Jiechi, Miyembro ng Pulitburo ng Partido Komunista ng Tsina (CPC) at Direktor ng Tanggapan ng Komisyon ng mga Suliraning Panlabas ng Komite Sentral ng CPC, na maaaring maunawaan ng komunidad ng daigdig ang Tsina mula sa mga anggulong gaya ng palagiang pagigiit ng Tsina sa mapayapang pag-unlad, pagpapasulong sa kooperasyon at win-win outcomes, pagsunod sa katwiran at katarungan, pagmumungkahi ng unibersal na seguridad, paghahanap ng nagkakaisang paninindigan habang may reserbasyon pa rin sa mga pagkakaiba.
Hinggil sa ika-2 tanong, ginamit ni Zheng Bijian, Presidente ng China Institute for Innovation and Development Strategy, ang salitang "duality" bilang konklusyon sa progreso at depekto ng modernong Tsina. Halimbawa, pagkaraan ng 40 taong reporma't pagbubukas, tumaas sa mahigit 82 trilyong yuan RMB ang GDP ng Tsina noong 2017, mula mahigit 360 bilyong yuan RMB noong 1978. Pero nasa mga ika-70 puwesto ang per capita GDP nito sa buong mundo. Sa isang banda, ang Tsina ay malaking bansa ng industriya ng pagyari sa daigdig, at sa kabilang banda naman, nananatiling katamtaman at mababa ang lebel ng industriya ng pagyari ng bansa. Ang ganitong "duality" ay nagpapakitang ang bagong round ng reporma at pagbubukas ng Tsina ay hindi lamang batay sa makasaysayang progreso nitong nakalipas na 40 taon, kundi nakabatay din sa bagong pangunahing kontradiksyon ng lipunan.
Pasaan ang Tsina pagkaraang isagawa ang bagong round ng reporma at pagbubukas? Ipinalalagay ng mga kalahok sa komperensya na malinaw ang sagot, walang iba kundi ang target ng pag-unlad ng pambansang kabuhayan at lipunan na iniharap sa Ika-19 na Pambasang Kongreso ng CPC: komprehensibong itatatag ang may kaginhawahang lipunan sa mataas na antas sa taong 2020, isasakatuparan sa kabuuan ang sosyalistang modernisasyon sa taong 2035, at itatatag ang isang malakas na sosyalita't modernong bansa na may kasaganaan, demokrasya, sibilisasyon, at harmonya sa kalagitnaan ng kasalukuyang siglo.
Salin: Vera
