Inanyayahan ng Konsulado ng Pilipinas sa Xiamen na dumalo at magtanghal sa pagdiriwang ng Ika-118 Anibersaryo ng Araw ng Kasarinlan ng Pilipinas ang acclaimed worldwide concert pianist na si Dr. Raul Sunico. Galing pa siya ng Europa para sa kanyang world tour at dumalaw siya sa kauna unahang pagkakataon sa Xiamen.
Si Dr. Raul Sunico
Dahil first ever performance sa Xiamen ni Dr. Sunico, hindi ito pinalagpas ng Filipino Community, kasama ang mga kaibigang Tsino, kanilang pinanood sa Kempinski Hotel ang konsiyerto na nagtampok ng western classical, Chinese at Filipino music.
Sa panayam ng China Radio International Serbisyo Filipino, sinabi ni Dr. Sunico na siya ay nagagalak sa kauna-unahan niyang pagdalaw sa Xiamen. Tinugtog niya ang mga classical pieces at hinaluan din ito ang ilang Filipino at Chinese songs. Isang estudyanteng Tsino aniya ang nagbigay ng mungkahing kanyang pag-aralan ang piyesang Colorful Clouds Chasing the Moon na likha ni Wang Jianzhong para masiyahan ang mga Tsinong bisita sa pagtatanghal. Samantala naantig naman ang damdamin ng mga Pinoy audience nang madinig ang kanyang bersyon ng Bato sa Buhangin ni Ernani Cuenco at ang Bayan Ko ni Jose Alejandrino.
Si Dr. Raul Sunico, kasama si Mac Ramos
Ayon kay Dr. Sunico may gusot man o wala ang cultural diplomacy ay laging ginagamit para mapasulong ang relasyon ng mga bansa. Kahit na may pagkakaiba, pagdating sa kultura lahat ng tao ay marunong magpahalaga at marunong tumingala sa kultura ng iba't ibang bansa. Nagpasalamat siya sa mga nanood at nagpaalala sa mga kababayang laging itayo ang dangal ng ating bansa sa pamamagitan ng mabubuting mga gawain. Tutulak patungong Amerika si Dr. Sunico para sa pagpapatuloy ng kanyang world tour.
Pakinggan ang ilang bahagi ng konsiyerto sa programang Mga Pinoy sa Tsina.
