Poverty incidence, nabawasan noong 2012
BAHAGYANG nabawasan ang bilang ng mahihirap sa Pilipinas noong 2012. Ito ang report ng National Statistics Coordination Board sa isang briefing kanina. Ayon sa ulat, umabot sa 25.2% mula sa 26.3% ng mga mamamayan ang kinikilalang mahihirap. Ang bilang na ito ay mula sa 20.5% ng mga pamilya noong 2009.
Sinabi ni Economic Planning Secretary Arsenio M. Balisacan sa pahayag na binasa ni Assistant Director General Rosemarie G. Edillon, maituturing itong "slow decline" subalit senyal na rin ng nagawa ng pamahalaan sa kampanya laban sa kahirapan. Sa datos na ito, maisasaayos nila ang kanilang mga estratehiya upang higit na maging epektibo ang kanilang mga palatuntunan.
Labingtatlo sa 17 rehiyon ng bansa ang nagkaroon ng kabawasan ng kahirapan kung ihahambing sa taong 2009. Umunlad ang katayuan ng CARAGA sa pagkakaroon ng 14.2 percentage points na kabawasan sa poverty incidence kung sa mga pamilya ang pag-uusapan. Nagkaroon ng kaunlarang umabot sa 10.6% sa CARAGA noong 2012, na ikalawang mabilis na gross regional domestic product growth sa lahat ng rehiyon sa pagkakaroon ng 8.5% growth noong 2011.
Napuna ang pagtaas ng poverty incidence sa SOCCSKSARGEN o Region XII, Autonomous Region of Muslim Mindanao (ARMM), Eastern Visayas at National Capital Region dahilan sa mahinang economic growth.
Higit na bumaba ang output ng Region VIII sa pansamantalang pagsasara ng PASAR noong unang bahagi ng 2012. Nagkaroon ng halos 3% ng itinaas ng poverty incidence sa rehiyon.
Ayon sa pahayag ni Director General Balisacan, mangangailangan ng pangmatagalang palatuntunan upang magkaroon ng sustained economic growth. Magkakaroon ng mas magandang benepisyo para sa mahihirap upang makalahok sa growth process. Ipinatutupad na ng pamahalaan ang Pantawid Pamilya Program, Community-Based Employment Program at Sustainable Livelihood Program at iba pa.
Magkakaroon din ng mga palatutunan para sa mga pagawaing bayan at paggastos sa pagsasanay sa mga mamamayan sa kanilang magiging kakayahang kumita ng salapi. Kailangan din ang social assistance na magsusulong sa economic at physical mobility.
Nararapat ding suriin ang epekto ng mga trahedyang dulot ng kalikasan sa kahirapan. Ang mga sama ng panahon ay makasisira sa natamong economic growth at kaunlaran.
Sa mga kalamidad tulad ng Zamboanga crisis, kailangang magkaroon ng pangmatagalang kapayapaan sa mga kilalang conflict areas na maituturing na isang uri ng disaster risk reduction.
1 2 3 4 5 6 7 8
