Bagong saksi sa pork-barrel scam, kinilala

Bagong saksi sa pork-barrel scam, kinilala

SINABI ni Kalihim Leila De Lima ng Kagawaran ng Katarungan na may bagong state witness ang pamahalaan laban sa pork barrel scam suspects. Kinilala ni Kalihim de Lima ang bagong saksi sa pangalang Dennis Cunanan, dating Deputy Director General ng Technology Resource Center.

Sa isang press briefing, sinabi ni Kalihim de Lima na tinanggap si Cunanan sa Witness Protection Program upang isailalim sa pagsusuri at pag-sangayon ng ng Office of the Ombudsman.

Ani Kalihim de Lima, ang pahayag ni Cunanan ang magpapawalang-saysay sa mga pahayag naman ng mga senador na wala silang kinalaman sa pagpili ng mga non-government organizations na nakinabang sa pork barrel.

Mga magsasapelikulang dinukot ng Abu Sayyaf, natagpuan na

NATAGPUAN na umano ang dalawang Filipina-Algerian filmmakers na dinukot ng mga Abu Sayyaf noong nakalipas na Hunyo, 2013. Natagpuan sina Nadjoua at Linda Bansil ng mga kawal ng Philippine Marines sa Patikul, Sulu.

Sinabi ni C/Supt. Reuben Theodore Sindac, tagapagsalita ng Philippine National Police na nakatakas ang magkapatid at 'di nagtagal ay nabawi ng mga kawal ng Philippine Marines. Sa mga taong nakababatid ng mga negosasyon, panahon na lamang ang hinihintay upang makalaya ang magkapatid.

Nakatakda na silang dalhin sa pagamutan ng Philippine Marines bago dalhin sa Zamboanga City. Ayon sa malapit na kaibigan ng magkapatid, malamang na bukas na makararating ang dalawa sa Zamboanga City.

Sa panig ng Sandatahang Lakas ng Pilipinas, sinabi ni Lt. Col. Ramon Zagala na nabawi ang magkapatid mga ika-lima ng umaga sa Sitio Kantatang, Barangay Buhanginan, Patikul, Sulu.

Nagtungo ang magkapatid upang magpelikula ng kahirapan ng mga magsasaka sa mga kapehan. Matagal nang gumagawa ng mga pelikula ang magkapatid na ang karaniwang paksa ay buhay ng mga Muslim sa Pilipinas.

Australian Foreign Minister Bishop dumalaw sa Malacanang

AUSTRALIAN FOREIGN MINISTER BISHOP, DUMALAW KAY PANGULONG AQUINO.  Pinag-usapan nina Australian Foreign Minister Julie Bishop at Pangulong Aquino ang mga isyung may kinalaman sa kalakal, kultura, edukasyon, seguridad at mga palatuntunang pangkaunlaran.  Ngayong taon ipinagdiriwang ang ika-40 anibersaryo ng ASEAN-Australia relations.  (Malacanang Photo)

DUMALAW si Australian Foreign Minister Julie Bishop kay Pangulong Aquino kahapon.

Si Prime Minister Bishop ang kauna-unahang foreign minister na babae sa Australia ang sinamahan ni Australian Minister for Trade and Investment Andrew Robb, New South Wales Premier Barry Robert O'Farrel and Australian Ambassador to the Philippines Bill Tweddell.

Dumalo rin sina Foreign Affairs Secretary Albert F. Del Rosario at Trade and Industry Secretary Gregory Domingo, Philippine Ambassador to Australia Belen Anota at Trade Undersecretary Adrian Cristobal, Jr.

Nasa Pillipinas sina Minister Bishop para sa paglulunsad ng ASEAN-Australia 40th Anniversary Commemoration sa The Peninsula Hotel kagabi.

Bagama't matagumpay na ang relasyon ng ASEAN at Australia sa nakalipas na 40 taon, mas maraming mga pagkakataong higit na mapaganda at madagdagan ang regional integration sa pagkakaroon ng ASEAN Community sa 2015.

Dumalo rin sa paglulunsad si ASEAN Secretary-General Le Luong Minh.

Naging paksa sa pag-uusap ang mga isyung may kinalaman sa seguridad, kultura, kalakal, edukasyon, mga palatuntunang pangkaunlaran at people-to-people exchanges.