Salaping 'di napakinabangan ng taongbayan, ipinasasauli
MAGLALABAS ang Commission on Audit ng notices of disallowances na nagkakahalaga ng P 4.96 bilyon sa ilang mga mambabatas sanhi ng kanilang taliwas sa batas na paggastos ng Priority Development Assistance Fund sa mga non-government organizations mula 2007 hanggang 2009.
Ito ang sinabi ni COA Chairperson Graced Pulido Tan sa isang pagdinig sa Mababang Kapulungan hinggil sa nawawalang P 30 bilyon infrastructure funds noong panahon ni Pangulong Gloria Macapagal-Arroyo.
Ani Gng. Tan, naglabas na sila ng 19 na notices of disallowance na nagkakahalaga ng P 1.83 bilyon sa tatlong senador at apat na mambabatas sa kanilang paglalabas ng PDAF sa kaduda-dudang non-government organizations. Pinapanagot ang isang tao kung mapapatunayang illegal ang transaksyon sa ilalim ng kasalukuyang batas.
Pinabulaanan niya ang balita ng Philippine Daily Inquirer na nagsabing may ilalabas na notices of disallowance sa may 120 mambabatas. Tumanggi ang COA chairperson sa balita at hindi umano nagmula sa kanya ang impormasyon.
May 19 na notices of disallowance sa pitong mambabatas dahilan sa mga transaksyon sa Technology Resource Center, National Livelihood Development Corporation (NLDC), National Agribusiness Corporation (NABCOR), at maging sa Zamboanga del Norte Rubber Estate Corporation.
Ayon sa balitang lumabas,a ang apat na korporasyong pag-aari ng pamahalaan ay sangkot sa P10 bilyong pork barrel scam.
1 2 3 4 5 6
