Tulong ng pamahalaan, huwag naman sanang pabalat-bunga

PANGULONG AQUINO, NAMAHAGI NG RELIEF GOODS.  Naghatid ng tulen si Pangulong Aquino sa mga biktima ng bagyo sa Morente Elementary School sa Pinamalayan, Oriental Mindoro.  Nakasama Aniya si Governor Rey Umali ng Mindoro Oriental.  (Ezequiel Supera/Malacanang Photo Bureau)

NANAWAGAN si Fr. Edu Gariguez, executive secretary ng National Secretariat of Social Action na sana'y huwag namang pabalat-bunga lamang ang itutulong sa mga nasalanta ng bagyong "Nona" at "Onyok."

Nagpapasalamat siya sa pangulo sa madaliang pagtugon sa pangangailangan ng mga biktima ng magkasunod na bagyo kasabay ng pag-asang huwag naman sanang pabalat-bunga lamang ang tulong na maipararating.

Idinagdag pa ni Fr. Gariguez na kailangang makamtan ang lahat ng tulong mula sa pamahalaan at pandaigdigang humanitarian community lalo na ngayong kapaskuhan.

PAARALANG BAYAN, NAPINSALA NG BAGYO.  Makikita sa larawan ang paaralang bayang hindi na mapakikinabangan sa pinsalang dulot ng bagyong "Nona" sa Pinamalayan, Oriental Mindoro.  (Fr. Edu Gariguez/NASSA)

Naglunsad na ang NASSA ng sariling kampanya sa 61 diyosesis sa buong bansa at umaasang makabubuo ng dagdag na pondo para sa mga biktima.

Una nang naglabas ang NASSA/Caritas Philippines ng halagang P1.89 milyon sa pamamagitan ng "Alay Kapwa" para sa mga biktima sa Oriental Mindoro, Northern Samar, Sorsogon, Masbate at Romblon.

KAHIT MGA PUNONGKAHOY AY NAPINSALA RIN.  Malakas ang hagupit ni "Nona" sa Oriental Mindoro ayon sa kuhang larawang ito ni Fr. Edu Gariguez ng CBCP/NASSA).  (Contributed Photo)

Unang tumugon ang Caritas Manila, Archdiocese of Capiz, Archdiocese of Palo, Diocese of Calbayog at Diocese of Tagbilaran.

Tumugon na rin ang Catholic Relief Services na nagbigay ng shelter at tool kits para sa Northern Samar at Caritas Luxemburg na nangakong magbibigay ng Euros 7,000 o P 350,000.

Dumalaw na rin kamakalawa si Pangulong Aquino sa Pinamalayan sa Oriental Mindoro at sa Laoang, Northern Samar na tinamaan ni "Nona".